Image captured from a video on VD Satheesan's official Facebook page.
തിരുവനന്തപുരം: പിഎസ്‌സി വിഷയത്തിൽ നിലപാട് വ്യക്‌തമാക്കി മുഖ്യമന്ത്രി വിഡി സതീശൻ. പിഎസ്‌സി ചെയർമാനെയും അംഗങ്ങളെയും പിരിച്ചുവിടാൻ ഗവർണർ രാഷ്‌ട്രപതിക്ക് ശുപാർശ നൽകിയത് നടപടിക്രമങ്ങൾ പാലിക്കാതെയാണെന്ന് മുഖ്യമന്ത്രി വ്യക്‌തമാക്കി.
സർക്കാരുമായി കൂടിയാലോചിച്ചാണ് ഗവർണർ പ്രവർത്തിക്കേണ്ടത്. ഗവർണർ നടപടിക്രമങ്ങൾ പാലിക്കാതെ ശുപാർശ നൽകി എന്നതിന്റെ പേരിൽ പിഎസ്‌സിയിലെ ക്രമക്കേടുകൾ മറയ്‌ക്കാൻ കഴിയില്ല. ഗവർണറുടെ നടപടി ചൂണ്ടിക്കാട്ടി പിഎസ്‌സി ചെയർമാനെയും അംഗങ്ങളെയും രക്ഷിക്കാനുള്ള ക്യാമ്പയിനാണ് ഇപ്പോൾ പ്രതിപക്ഷം ചെയ്യുന്നതെന്നും മുഖ്യമന്ത്രി പറഞ്ഞു.
മന്ത്രിസഭാ യോഗത്തിന് ശേഷമുള്ള വാർത്താ സമ്മേളനത്തിലാണ് മുഖ്യമന്ത്രി ഇക്കാര്യങ്ങൾ പറഞ്ഞത്. പിഎസ്‌സി ക്രമക്കേടിനെ കുറിച്ചുള്ള അന്വേഷണത്തിൽ ഞെട്ടിക്കുന്ന വിവരങ്ങളാണ് പുറത്തുവന്നിരിക്കുന്നത്. സ്വന്തക്കാരെയും ബന്ധുക്കളെയും പാർട്ടിക്കാരെയും നിയമിച്ചുവെന്നാണ് പ്രാഥമിക അന്വേഷണത്തിൽ കണ്ടെത്തിയത്.
ധാരാളം പരാതികൾ ഇപ്പോഴും കിട്ടിക്കൊണ്ടിരിക്കുകയാണ്. പരാതികൾ അന്വേഷണ സംഘത്തിന് കൈമാറും. എല്ലാ പരാതികളും അന്വേഷിക്കും. പിഎസ്‌സിയുടെ വിശ്വാസ്യത വീണ്ടെടുക്കും. കുറ്റക്കാരെ നിയമത്തിന്റെ മുന്നിൽ കൊണ്ടുവരും. അതിന് വിട്ടുവീഴ്‌ചയില്ലാത്ത, കാർക്കശ്യം നിറഞ്ഞ നിലപാടാണ് സർക്കാർ സ്വീകരിക്കുകയെന്നും മുഖ്യമന്ത്രി പറഞ്ഞു.
‘വൈദ്യുതി വാങ്ങുന്നത് ഇപ്പോൾ മാത്രം തുടങ്ങിയതല്ല’
വൈദ്യുതി പ്രതിസന്ധി മുൻകൂട്ടി കാണുന്നതിൽ മുൻ സർക്കാറിനും വീഴ്‌ച പറ്റിയിട്ടുണ്ടെന്ന് മുഖ്യമന്ത്രി. 465 മെഗാവാട്ട് വൈദ്യുതി യൂണിറ്റിന് 4.29 രൂപ നിരക്കിൽ ലഭിച്ചിരുന്ന കരാർ റദ്ദാക്കിയ ശേഷം ഉയർന്ന നിരക്കിൽ വൈദ്യുതി വാങ്ങേണ്ടി വന്നുവെന്നാണ് ആരോപണം. യൂണിറ്റിന് എട്ടുമുതൽ 14 രൂപ വരെ നൽകിയാണ് വൈദ്യുതി വാങ്ങിയതെന്നും ഇതിന്റെ പട്ടിക പരിശോധിച്ചാൽ ഞെട്ടിപ്പോകുമെന്നും മുഖ്യമന്ത്രി പറഞ്ഞു.
വൈദ്യുതി പ്രതിസന്ധി നേരിടാൻ റെഗുലേറ്ററി കമ്മീഷന്റെ അനുമതിയോടെയും ചില സാഹചര്യങ്ങളിൽ പ്രത്യേക വ്യവസ്‌ഥകൾ പ്രകാരവും വൈദ്യുതി വാങ്ങിയിട്ടുണ്ട്. പ്രതിസന്ധി ഘട്ടങ്ങളിൽ റെഗുലേറ്ററി കമ്മീഷൻ നിശ്‌ചയിച്ച പരിധിക്ക് മുകളിൽ വൈദ്യുതി വാങ്ങിയാൽ അധിക ചെലവ് സർക്കാർ വഹിക്കേണ്ടി വരുമെന്നും വിശദീകരിച്ചു.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
