കാൻബറ: ആനിമേഷൻ പരമ്പരകളുടെ കട്ട ഫാൻസാണ് കുട്ടികൾ. ഇത്തരം പരമ്പരകളിലെ കഥാപാത്രങ്ങളുടെ പേരും പാട്ടും ഡയലോഗുമെല്ലാം അവർക്കു കാണാപാഠമാണ്. ഇത്തരത്തിൽ കുട്ടികൾ ഏറെ ഇഷ്ടപ്പെടുന്ന ആനിമേഷൻ പരമ്പരകളിൽ ഒന്നാണ് ‘പിങ്കു’. കുട്ടികൾ ആനിമേഷൻ പരമ്പരകളുടെ ആരാധകരായി മാറുന്നത് സാധാരണ സംഭവമാണ്. എന്നാൽ ഒരു പെൻഗ്വിൻ ആരാധകനായി എന്നു കേട്ടാലോ?! വിശ്വസിക്കാൻ തോന്നുന്നില്ലേ? എങ്കിൽ വിശ്വസിച്ചേ പറ്റൂ, സംഗതി സത്യമാണ്.
ഓസ്ട്രേലിയയിലെ പെർത്ത് മൃഗശാലയിലാണ് ഇത്തരത്തിൽ ആനിമേഷൻ പരമ്പരയുടെ കട്ട ആരാധകനായ ഒരു പെൻഗ്വിൻ ഉള്ളത്, പേര് പിയറി. കുട്ടികൾക്കുള്ള ആനിമേഷഷൻ പരമ്പരയായ ‘പിങ്കു’വിന്റെ ആരാധകനാണ് പിയറി. വംശനാശഭീഷണി നേരിടുന്ന നോർത്തേൺ റോക്ക്‌ഹോപ്പർ പെൻഗ്വിൻ ആണ് പിയറി. രാജ്യത്തിന്റെ തെക്ക് പടിഞ്ഞാറ് ഭാഗത്തുള്ള ഒരു കടൽത്തീരത്താണ് പിയറിയെ കണ്ടെത്തിയത്. ഓസ്ട്രേലിയയിൽ ആദ്യമായാണ് നോർത്തേൺ റോക്ക്‌ഹോപ്പർ പെൻ‌ഗ്വിനെ കണ്ടെത്തുന്നത്.
അരോഗ്യ സ്ഥിതി മോശമായതിനാൽ പിയറിയെ പെട്ടന്ന് കടലിലേക്ക് തിരിച്ചയക്കാൻ കഴിയുമായിരുന്നില്ല. അതിനാൽ പിയറിയെ പെർത്ത് മൃഗശാലയിലേക്ക് മാറ്റുകയായിരുന്നു. പിയറിയുടെ വിഭാഗത്തിൽ പെടുന്ന മറ്റു പെൻഗ്വിനുകൾ മൃഗശാലയിൽ ഇല്ലാത്തതിനാൽ അവന് ഏകാന്തത അനുഭവപ്പെടാൻ സാധ്യതയുണ്ടെന്നും തിരിച്ച് കടലിലേക്ക് മടക്കിയയക്കുമ്പോൾ മറ്റു പെൻഗ്വിനുകളുമായി ഇടപഴകാൻ സാധിക്കാതെ വരുമെന്നും മൃശാല അധികൃതർ ഭയപ്പെട്ടു. ഇതിനെത്തുടർന്ന് മറ്റു മൃഗശാലകളിലുള്ള പിയറിയുടെ വിഭാഗത്തിൽ പെടുന്ന പെൻഗ്വിനുകളുടെ വീഡിയോകളും ‘പിങ്കു’ ആനിമേഷൻ പരമ്പരയും കാണിക്കാൻ തുടങ്ങി. ഇതോടെ പിയറി പെൻഗ്വിനുകൾ കഥാപാത്രങ്ങളാകുന്ന ‘പിങ്കു’വിന്റെ ആരാധകനായി.
ഐപാഡിൽ ‘പിങ്കു’ കാണുന്ന പിയറിയുടെ വീഡിയോ മൃഗശാല അധികൃതർ സോഷ്യൽ മീഡിയയിൽ പങ്കുവച്ചു. ഇതോടെ നിരവധി പേരാണ് പിയറിയോടുള്ള സ്നേഹവും കരുതലുമായി രംഗത്തെത്തിയത്.
