ന്യൂഡെൽഹി: കാർഷിക നിയമങ്ങൾക്കെതിരേ സമർപ്പിച്ച ഹരജികളിൽ കേന്ദ്രസർക്കാരിന് നോട്ടീസയച്ച് സുപ്രീം കോടതി. കേന്ദ്രം നാലാഴ്ചക്കകം ഇതിന് മറുപടി നൽകണമെന്ന് സുപ്രീം കോടതി ചീഫ് ജസ്റ്റിസ് എസ്.എ ബോബ്ഡെ അധ്യക്ഷനായ ബെഞ്ച് ഉത്തരവിട്ടു.
ആർജെഡി എംപി മനോജ് ഖവമ, ഡിഎംകെ എംപി തിരുച്ചി ശിവ എന്നിവർ സമർപ്പിച്ച ഹരജികളിലാണ് സുപ്രീം കോടതിയുടെ നടപടി. കാർഷിക ബില്ലുകൾ പാസാക്കിയ കേന്ദ്രസർക്കാരിന്റെ നടപടി സംസ്ഥാനങ്ങളുടെ പരിധിയിൽ വരുന്നതാണെന്നും ഈ വിഷയത്തിൽ കേന്ദ്രത്തിന്റെ കയ്യേറ്റം അനുവദിക്കാൻ കഴിയില്ലെന്നും തിരുച്ചി ശിവയുടെ ഹരജിയിൽ വ്യക്തമാക്കി.
അതേസമയം, കാർഷിക ബില്ലുകൾ പിൻവലിക്കണമെന്ന് ആവശ്യപ്പെട്ട് പഞ്ചാബിലെ ആം ആദ്മി പാർട്ടി നേതാക്കളും ജനപ്രതിനിധികളും ഡൽഹിയിലെ ജന്തർ മന്ദിറിൽ പ്രതിഷേധ ധർണ സംഘടിപ്പിച്ചു.