ന്യൂഡല്ഹി: മുന് രാഷ്ട്രപതിയും സമുന്നത കോണ്ഗ്രസ്സ് നേതാവുമായിരുന്ന പ്രണബ് മുഖര്ജിയുടെ ഭൗതികശരീരം മണ്ണിലേക്ക് ചേര്ന്നു. ലോധി റോഡിലെ ശ്മശാനത്തിലാണ് ഉച്ചക്ക് രണ്ട് മണിയോടെ സംസ്കാര ചടങ്ങുകള് നടന്നത്. പൂര്ണ സൈനിക ബഹുമതികളുടെ പരിഗണ ഭൗതിക ശരീരത്തിന് ലഭിച്ചിരുന്നു. ഡല്ഹിയിലെ സൈനിക ആശുപത്രിയില് ചികിത്സയിലിരിക്കെ തിങ്കളാഴ്ച വൈകിട്ട് അഞ്ചരയോടെയാണ് അന്തരിച്ചത്. 84 വയസ്സായിരുന്നു. തലച്ചോറിലെ രക്തസ്രാവത്തിന് ചികിത്സയിലായിരുന്ന ഇദ്ദേഹത്തിന് കഴിഞ്ഞ ദിവസം കോവിഡ്19
സ്ഥിരീകരിച്ചിരുന്നു.
രാജാജി മാര്ഗിലെ ഔദ്യോഗിക വസതിയിലാണ് ഭൗതികശരീരം പൊതുദര്ശനത്തിന് വെച്ചിരുന്നത്. രാവിലെ 9 മുതല് രണ്ട് വരെയായിരുന്നു ദര്ശനം അനുവദിച്ചത്. കേന്ദ്ര ആരോഗ്യ മന്ത്രാലയത്തിന്റെ എല്ലാ കൊവിഡ് മാര്ഗനിര്ദേശങ്ങളും സംസ്കാര ചടങ്ങില് പാലിച്ചിരുന്നു. ഇത് കൂടാതെ പ്രതിരോധമന്ത്രാലയം ഏര്പ്പെടുത്തിയ മറ്റു സുരക്ഷകളും ഉണ്ടായിരുന്നു. മാനദണ്ഡങ്ങള് പാലിച്ചു കൊണ്ട് തന്നെ, രാജ്യത്തെ പ്രധാന രാഷ്ട്രീയ നേതാക്കളെല്ലാം പ്രണബിന് അന്ത്യാഭിവാദ്യം അര്പ്പിച്ചിരുന്നു. പ്രധാനമന്ത്രി നരേന്ദ്ര മോദി, രാഷ്ട്രപതി രാംനാഥ് കോവിന്ദ്, ഉപരാഷ്ട്രപതി വെങ്കയ്യ നായിഡു, പ്രതിരോധ മന്ത്രി രാജ്നാഥ് സിങ് തുടങ്ങി ആയിരക്കണക്കിന് ആളുകളാണ് രാജാജി മാര്ഗിലെ ഔദ്യോഗിക വസതിയിലെത്തി അന്ത്യോപചാരം അര്പ്പിച്ചത്. മുന് പ്രധാനമന്ത്രി മന്മോഹന് സിങ്ങും മുതിര്ന്ന കോണ്ഗ്രസ് നേതാക്കളും നേതാവിന് ആദരവര്പ്പിക്കാനെത്തി.
മുഖപ്രസംഗം ഇവിടെ വായിക്കാം: പ്രണാബ് ദാക്ക് പ്രണാമം