കൊച്ചി: ലോക്ക്ഡൗൺ വിലക്കുകൾ തുടരുന്നതിനിടെ നിയന്ത്രണങ്ങൾ ലംഘിച്ച് ആദ്യകുർബാന ചടങ്ങ് സംഘടിപ്പിച്ച പള്ളി വികാരി അറസ്റ്റിൽ. ചെങ്ങമനാട് പുവ്വത്തുശ്ശേരി സെന്റ് ജോസഫ് പള്ളി വികാരി ഫാ. ജോർജ് പാലമറ്റത്താണ് അറസ്റ്റിലായത്.
ഇന്ന് രാവിലെ 8 മണിയോടെയാണ് ആദ്യകുർബാന ചടങ്ങ് നടന്നത്. സംഭവത്തിൽ 25ഓളം ആളുകൾക്ക് എതിരെ പോലീസ് കേസെടുത്തിട്ടുണ്ട്. കുട്ടികൾ, മാതാപിതാക്കൾ, പള്ളി വികാരി, സഹ വികാരി എന്നിവർക്ക് എതിരെയാണ് കേസെടുത്തത്. സമീപവാസികളാണ് ചടങ്ങിനെതിരെ പരാതി നൽകിയത്. പരാതി ലഭിച്ചതിന് പിന്നാലെ പോലീസ് സ്ഥലത്തെത്തി നടപടികൾ സ്വീകരിക്കുകയായിരുന്നു. 100ലധികം ആളുകൾ ചടങ്ങിൽ പങ്കെടുത്തെന്നാണ് നാട്ടുകാർ ആരോപിക്കുന്നത്.
എപിഡെമിക് ആക്ട് പ്രകാരമാണ് ഇവർക്ക് എതിരെ കേസ് രജിസ്റ്റർ ചെയ്തിരിക്കുന്നത്. അറസ്റ്റ് രേഖപ്പെടുത്തിയതിന് പിന്നാലെ ഫാ. ജോർജ് പാലമറ്റത്തെ പിഴ ഈടാക്കിയ ശേഷം ജാമ്യത്തിൽ വിട്ടു. അതേസമയം, കേസിലെ മുഴുവൻ പ്രതികളെയും അറസ്റ്റ് ചെയ്യുമെന്ന് പോലീസ് അറിയിച്ചു.
Read also: സെൻട്രൽ വിസ്ത പദ്ധതി; നിർമാണം തടയാനാകില്ലെന്ന് ഡെൽഹി ഹൈക്കോടതി