തിരുവനന്തപുരം: പിണറായി സര്ക്കാരിനെതിരെയുള്ള പ്രതിപക്ഷത്തിന്റെ അവിശ്വാസപ്രമേയം ദയനീയമായി പരാജയപ്പെട്ടു. 40 നെതിരെ 87 വോട്ടുകള്ക്കാണ് പരാജയം. ഇന്ന് ഉച്ച മുതല് ആരംഭിച്ച അവിശ്വാസ പ്രമേയ ചര്ച്ചകള്ക്കൊടുവില് രാത്രി 9.30 വരെ നീണ്ടുനിന്ന സംഭവബഹുലമായ സമ്മേളനത്തിലൊടുവിലാണ് പ്രമേയം തള്ളിയത്. കേരള കോണ്ഗ്രസ് ജോസ് വിഭാഗം വോട്ടെടുപ്പില് നിന്ന് വിട്ടുനിന്നു.
മൂന്നര മണിക്കൂറിലധികം നീണ്ടുനിന്ന മറുപടി പ്രസംഗത്തില് സ്വര്ണക്കടത്ത് കേസിനെക്കുറിച്ചുള്ള ചോദ്യങ്ങള്ക്ക് മുഖ്യമന്ത്രി വ്യക്തമായ മറുപടി നല്കിയില്ല എന്നാരോപിച്ച് പ്രതിപക്ഷം നടുത്തളത്തിലിറങ്ങി. മുഖ്യമന്ത്രി മനഃപൂര്വം നടപടികള് വൈകിക്കുകയാണെന്നും അവര് ആരോപിച്ചു. ഇരുമുന്നണികളുടെയും ഏറ്റുമുട്ടലുകള്ക്കൊടുവില് പ്രതിപക്ഷം ദയനീയമായി പരാജയപ്പെടുകയാണ് ഉണ്ടായത്. 93 പേരുടെ പിന്തുണയുള്ള ഇടതുമുന്നണിയുടെ വിജയം സഭ ചേരുന്നതിനു മുന്പേ നിശ്ചയിക്കപ്പെട്ടതായിരുന്നു. ജോസ് പക്ഷം വിട്ടുനില്ക്കുക ചെയ്തതോടെ അനിവാര്യമായ തോല്വി പ്രതിപക്ഷം ഏറ്റുവാങ്ങി. സഭ അനിശ്ചിത കാലത്തേക്ക് പിരിഞ്ഞു.