തിരുവനന്തപുരം : സംസ്‌ഥാനത്ത് നാളെ മുതല്‍ ഒറ്റപ്പെട്ട പ്രദേശങ്ങളില്‍ മഴക്ക് സാധ്യതയുണ്ടെന്ന മുന്നറിയിപ്പുമായി കാലാവസ്‌ഥാ നിരീക്ഷണ കേന്ദ്രം. ഈ മാസം 25 ആം തീയതി വരെ മഴ തുടര്‍ന്നേക്കാമെന്നും കാലാവസ്‌ഥാ കേന്ദ്രം വ്യക്‌തമാക്കി. ഇടിമിന്നലോട് കൂടി പെയ്യുന്ന മഴ ആയതിനാല്‍ തന്നെ ആളുകള്‍ ജാഗ്രത പാലിക്കണമെന്ന് അധികൃതര്‍ നിര്‍ദേശം നല്‍കി.
ഈ മാസം 24 ആം തീയതി പത്തനംതിട്ട, ഇടുക്കി ജില്ലകളിലും, 25 ആം തീയതി തിരുവനന്തപുരം, കൊല്ലം, ഇടുക്കി, പത്തനംതിട്ട ജില്ലകളിലും ഒറ്റപ്പെട്ട ശക്‌തമായ മഴ പെയ്യാനുള്ള സാധ്യത ഉള്ളതിനാല്‍ ഈ ജില്ലകളില്‍ പ്രസ്‌തുത ദിവസങ്ങളില്‍ യെല്ലോ അലേര്‍ട്ട് പ്രഖ്യാപിച്ചിട്ടുണ്ട്.
മഴക്കൊപ്പം തന്നെ ശക്‌തമായ ഇടിമിന്നല്‍ ഉണ്ടാകാനുള്ള സാധ്യതയും കാലാവസ്‌ഥാ കേന്ദ്രം വ്യക്‌തമാക്കിയിട്ടുണ്ട്. ഉച്ചക്ക് ശേഷം 2 മണി മുതൽ രാത്രി 10 മണി വരെയായിരിക്കും ശക്‌തമായ ഇടിമിന്നല്‍ രൂപപ്പെടാന്‍ സാധ്യത. അതിനാല്‍ തന്നെ ഈ സമയങ്ങളില്‍ തുറസായ സ്‌ഥലങ്ങളിലും ടെറസുകളിലും കുട്ടികള്‍ കളിക്കുന്നതും മറ്റും ഒഴിവാക്കണമെന്ന് അധികൃതര്‍ നിര്‍ദേശം നല്‍കി.
Read also : ഇബ്രാഹിം കുഞ്ഞിന്റെ ആരോഗ്യ പരിശോധന റിപ്പോര്‍ട്ട് ഇന്ന് തയ്യാറാക്കും
