തിരുവനന്തപുരം: ആദ്യ ഡോസ് വാക്സിൻ എടുത്തവര് ഉറപ്പായും അടുത്ത ഡോസ് എടുക്കണമെന്ന് ആരോഗ്യ വകുപ്പ് മന്ത്രി കെകെ ശൈലജ. നിശ്ചിത ഇടവേളകളില് രണ്ട് പ്രാവശ്യം വാക്സിന് എടുത്താല് മാത്രമേ ഫലം ലഭിക്കൂ. 4 മുതല് 6 ആഴ്ചകള്ക്കുള്ളിലാണ് രണ്ടാമത്തെ ഡോസ് എടുക്കേണ്ടത്. ആദ്യഡോസ് എടുത്തു കഴിഞ്ഞാല് ഉണ്ടാകുന്ന ചെറിയ ബുദ്ധിമുട്ടുകള് പോലും റിപ്പോർട് ചെയ്യണം. ആ പ്രശ്നങ്ങള് മനസിലാക്കാന് കൂടിയാണ് രണ്ടാമത്തെ വാക്സിന് എടുക്കുന്നതിനുള്ള സമയം നീട്ടിയതെന്നും മന്ത്രി പറഞ്ഞു.
വാക്സിനെ പറ്റി തെറ്റിദ്ധാരണകള് പരത്തരുത്. ഭയപ്പെടേണ്ട കാര്യമില്ലെന്നും മന്ത്രി വ്യക്തമാക്കി. ആരോഗ്യ വകുപ്പ് സംഘടിപ്പിച്ച ‘വാക്സിന് എടുക്കാം സുരക്ഷിതരാകാം’ ശില്പശാല ഉൽഘാടനം ചെയ്ത് സംസാരിക്കുക ആയിരുന്നു മന്ത്രി.
ജനങ്ങളുടെ ആശങ്കയും അഭിപ്രായങ്ങളും പങ്കുവെക്കാനാണ് ഇങ്ങനെയൊരു സെമിനാര് സംഘടിപ്പിച്ചത്. കേന്ദ്ര സര്ക്കാരിന്റെ മാര്ഗനിര്ദേശങ്ങൾ അനുസരിച്ചാണ് വാക്സിനേഷന് നടത്തുന്നത്. വാക്സിനിലൂടെ മാത്രമേ കൃത്രിമ പ്രതിരോധം തീര്ക്കാന് സാധിക്കൂ. കേരളം നടത്തിയ വലിയ പ്രതിരോധ പ്രവര്ത്തനങ്ങളുടെ ഭാഗമായി ധാരാളം പേര്ക്ക് കോവിഡ് വരാതെ സംരക്ഷിക്കാന് സാധിച്ചു. ഈ ആളുകളിലേക്ക് പൂര്ണമായി വാക്സിന് എത്തിക്കുക എന്നതാണ് ലക്ഷ്യം.
ആദ്യം ആരോഗ്യ പ്രവര്ത്തകര്ക്കാണ് വാക്സിന് നല്കുന്നത്. അവര്ക്ക് വാക്സിനേഷനില് പങ്കെടുക്കാന് കൃത്യമായ സന്ദേശം ലഭിക്കും. രണ്ടാംഘട്ടത്തില് മുന്നിര പ്രവര്ത്തകര്ക്കാണ് വാക്സിന് നല്കുന്നത്. പരമാവധി ആളുകള്ക്ക് വാക്സിന് നല്കണമെന്നാണ് ആഗ്രഹം. എല്ലാവരും മാസ്ക് ധരിക്കുകയും സാമൂഹിക അകലം പാലിക്കുകയും കൈകള് ഇടക്കിടക്ക് ശുചിയാക്കുകയും വേണം. എല്ലാവരും വാക്സിനെടുത്ത് കോവിഡിനെ തുരത്തിയാല് മാത്രമേ നമുക്ക് സ്വതന്ത്രരായി ജീവിക്കാന് സാധിക്കൂ.
ഒരു വര്ഷമായി കോവിഡ് പ്രതിരോധ പ്രവര്ത്തനങ്ങളില് ഏര്പ്പെട്ടിരിക്കുകയാണ് സംസ്ഥാനം. കേരളത്തിന്റെ മികച്ച പ്രതിരോധം കാരണം വൈറസിന്റെ വ്യാപനവും മരണ നിരക്കും കുറക്കാന് സാധിച്ചു. കോവിഡ് പ്രതിരോധത്തില് മുന്നില് നിന്ന് പ്രവര്ത്തിക്കുന്ന ആരോഗ്യ പ്രവര്ത്തകരെ അഭിനന്ദിക്കുന്നു. മുഖ്യമന്ത്രിയുടെ നേതൃത്വത്തില് വലിയ പ്രവര്ത്തനമാണ് നടക്കുന്നത്. ജില്ലകളില് അതത് മന്ത്രിമാര്ക്കായിരിക്കും വാക്സിനേഷന്റെ ചുമതല. വാക്സിന് വിജയകരമായി നടപ്പിലാക്കാന് എല്ലാവരുടേയും പിന്തുണ തേടുന്നതായും മന്ത്രി പറഞ്ഞു.
ആരോഗ്യ വകുപ്പ് പ്രിന്സിപ്പല് സെക്രട്ടറി ഡോ. രാജന് എന് ഖോബ്രഗഡെ വിഷയാവതരണം നടത്തിയ ചടങ്ങില് പ്ളാനിംഗ് ബോര്ഡ് മെമ്പര് ഡോ. ബി ഇക്ബാല്, മുഖ്യമന്ത്രിയുടെ കോവിഡ്-19 ഉപദേഷ്ടാവ് രാജീവ് സദാനന്ദന്, ഡബ്ള്യൂഎച്ച്ഒ പ്രതിനിധി ഡോ. റോഡറിഗോ എച്ച് ഓഫ്രിന്, യൂണിസെഫ് പ്രതിനിധി സുഗത റോയ് എന്നിവര് മുഖ്യ പ്രഭാഷണം നടത്തി.
കോവിഡ് വാക്സിന് അടിസ്ഥാന വിവരങ്ങള് എന്ന വിഷയത്തില് തിരുവനന്തപുരം മെഡിക്കല് കോളേജ് കമ്മ്യൂണിറ്റി മെഡിസിന് വിഭാഗം മേധാവി ഡോ. പിഎസ് ഇന്ദു, കോവിഡ് വാക്സിനും ആരോഗ്യവും എന്ന വിഷയത്തില് എസ്എടി ആശുപത്രി സൂപ്രണ്ട് ഡോ. എ സന്തോഷ് കുമാര്, അസി. പ്രൊഫസര് ഡോ. റിയാസും സംസാരിച്ചു.
പ്രതിരോധ കുത്തിവെപ്പും സാമൂഹ്യ ആരോഗ്യവും എന്ന വിഷയത്തില് മെഡിക്കല് കോളേജ് അസോ. പ്രൊഫസര് ഡോ. ടിഎസ് അനീഷ്, വാക്സിന് വിതരണ സംവിധാനം എന്ന വിഷയത്തില് എന്എച്ച്എം സ്റ്റേറ്റ് മിഷന് ഡയറക്ടർ ഡോ. രത്തന് ഖേല്ക്കര്, മെഡിക്കല് കോളേജിലെ സംവിധാനങ്ങള് എന്ന വിഷയത്തില് ആരോഗ്യ വിദ്യാഭ്യാസ വകുപ്പ് ഡയറക്ടർ ഡോ. എ റംലാ ബീവി എന്നിവര് സംസാരിച്ചു.
ആരോഗ്യ വകുപ്പ് ഡയറക്ടർ ഡോ. ആര്എല് സരിത സ്വാഗതവും കേരള എയിഡ്സ് കണ്ട്രോള് സൊസൈറ്റി പ്രോജക്റ്റ് ഡയറക്ടർ ഡോ. ആര് രമേഷ് നന്ദിയും പറഞ്ഞു.
Also Read: ജെസ്നയുടെ തിരോധാനം; ഹേബിയസ് കോർപസ് ഹരജി പിൻവലിച്ചു; എങ്ങുമെത്താതെ അന്വേഷണം