തിരുവനന്തപുരം: സംസ്ഥാനത്ത് രണ്ടാംഘട്ട കോവിഡ് 19 വാക്സിനേഷന് ഇന്ന് മുതല് ആരംഭിക്കും. 60 വയസിന് മുകളില് പ്രായമുള്ള എല്ലാ പൗരന്മാര്ക്കും 45നും 59നും ഇടയില് പ്രായമുള്ള മറ്റ് രോഗ ബാധിതര്ക്കുമാണ് രജിസ്ട്രേഷന് അനുവദിക്കുന്നത്. കേന്ദ്ര ആരോഗ്യ മന്ത്രാലയത്തിന്റെ മാര്ഗ നിര്ദേശമനുസരിച്ച് സംസ്ഥാനത്തെ വിവിധ സര്ക്കാര് ആശുപത്രികള്ക്ക് പുറമേ തിരഞ്ഞെടുക്കപ്പെട്ട സ്വകാര്യ ആശുപത്രികളിലും വാക്സിനെടുക്കാനുള്ള സൗകര്യമൊരുക്കും.
സര്ക്കാര് ആശുപത്രികളില് വാക്സിനേഷന് സൗജന്യമാണ്. കോവിന് ( https://www.cowin.gov.in/home ) പോര്ട്ടല് വഴിയും ആരോഗ്യ സേതു ആപ്പ് വഴിയും പൊതുജനങ്ങള്ക്ക് വാക്സിനേഷനായി രജിസ്റ്റര് ചെയ്യാം. രജിസ്ട്രേഷന് സമയത്ത് ഗുണഭോക്താവിന്റെ ഫോട്ടോ, ഐഡി കാര്ഡിലുള്ള അടിസ്ഥാന വിവരങ്ങള് എന്നിവ നല്കേണ്ടതാണ്. രജിസ്ട്രേഷന് മുൻപ് മൊബൈല് നമ്പറിന്റെ കൃത്യത ഉറപ്പാക്കുന്നതിന് ഒടിപി പരിശോധന നടത്തും.
വാക്സിനേഷനായി എത്തുമ്പോൾ ആധാര് കാര്ഡോ അല്ലെങ്കിൽ മറ്റ് അംഗീകൃത ഫോട്ടോ പതിപ്പിച്ച തിരിച്ചറിയല് കാര്ഡോ കയ്യിൽ കരുതണം. 45 വയസ് മുതല് 59 വയസ് വരെയുള്ളവരാണെങ്കില് രജിസ്റ്റര് ചെയ്ത മെഡിക്കല് പ്രാക്റ്റീഷണര് ഒപ്പിട്ട കോമോര്ബിഡിറ്റി സര്ട്ടിഫിക്കറ്റ് വാക്സിനേഷന് കേന്ദ്രത്തില് സമര്പ്പിക്കണം.
Also Read: ആര്ടിപിസിആര് പരിശോധനക്കുള്ള മാര്ഗനിര്ദേശം പുതുക്കി