ജമ്മു കാശ്മീരിലെ ബാരാമുള്ള ജില്ലയിലുണ്ടായ തീവ്രവാദി ആക്രമണത്തില്‍ രണ്ട് സിആര്‍പിഎഫ് ജവാന്മാരും, ഒരു സ്പെഷ്യല്‍ പോലീസ് ഓഫീസറും വീരമൃത്യു വരിച്ചു. ബാരാമുള്ളയിലെ ക്രീരി പ്രദേശത്തുണ്ടായ ഏറ്റുമുട്ടലിലാണ് ഇവര്‍ക്ക് ജീവന്‍ നഷ്ടമായത്.
സിആര്‍പിഎഫ്, പോലീസ് സംയുക്ത സംഘത്തിന് നേരെ തീവ്രവാദികള്‍ വെടിയുതിര്‍ക്കുകയായിരുന്നു എന്നാണ് വിവരം. എന്നാല്‍ വെടിവെപ്പിന് ശേഷം ആക്രമികള്‍ സംഭവസ്ഥലത്തു നിന്ന് രക്ഷപെട്ടുവെന്നും അവര്‍ക്ക് വേണ്ടിയുള്ള തിരച്ചില്‍ പ്രദേശമാകെ വ്യാപിപ്പിക്കുവാനുള്ള ഒരുക്കത്തിലാണ് സുരക്ഷാ സേനകള്‍ എന്നുമാണ് റിപ്പോര്‍ട്ട്. ‘ഇന്ന് ബാരാമുള്ളയില്‍ ഉണ്ടായ ആക്രമണത്തില്‍ പരിക്കേറ്റ രണ്ട് സിആര്‍പിഎഫ് ജവാന്മാര്‍ മരണത്തിനു കീഴടങ്ങി’ ജമ്മു കശ്മീര്‍ പോലീസിലെ ഐജി വിജയകുമാര്‍ വാര്‍ത്ത സ്ഥിരീകരിച്ചു.
