മലപ്പുറം: സിപിഎം സ്വതന്ത്ര സ്ഥാനാർഥിയായപ്പോൾ പിവി അൻവർ എംഎൽഎയ്ക്കൊപ്പം കോൺഗ്രസിൽ നിന്നെത്തി ഇടതുപക്ഷത്തിനൊപ്പം നിന്നവർ കൂട്ടത്തോടെ എൻസിപിയിൽ ചേർന്നു. കഴിഞ്ഞ തിരഞ്ഞെടുപ്പ് പ്രചാരണങ്ങളിൽ എല്ലാം സജീവമായി ഒപ്പമുണ്ടായിരുന്ന അൻവറിന്റെ സഹോദരൻ പിവി അജ്മൽ എൻസിപി സംസ്ഥാന സെക്രട്ടറി കൂടിയായതോടെ മലപ്പുറം ജില്ലയുടെ കിഴക്കനേറനാട് രാഷ്ട്രീയത്തിൽ എൻസിപിയും സജീവമാവുകയാണ്.
പിവി അൻവർ സിപിഎം സ്വതന്ത്ര സ്ഥാനാർഥി ആയപ്പോൾ ആദ്യം കോൺഗ്രസ് വിമതരായും പിന്നീട് ഇടതുപക്ഷത്തിനൊപ്പം നിന്നവരുമാണ് ഇപ്പോൾ കൂട്ടത്തോടെ എൻസിപിയിൽ ചേർന്നിരിക്കുന്നത്. പിവി അൻവറിന്റെ ഭാഗമായി നിന്നവർക്ക് സ്വാധീനമുള്ള നിലമ്പൂർ, വണ്ടൂർ, ഏറനാട് മണ്ഡലങ്ങളിൽ എൻസിപി ഓഫിസുകൾ തുറന്നുകഴിഞ്ഞു. വിവിധ പാർട്ടികളിലെ അതൃപ്തരെ എൻസിപിയിൽ ചേർക്കാനുള്ള ശ്രമങ്ങളും നടക്കുന്നുണ്ട്.
അതേസമയം, പിവി അൻവർ സിപിഎം സ്വതന്ത്രനായി തുടരട്ടെ എന്നാണ് എൻസിപി സംസ്ഥാന അധ്യക്ഷൻ പിവി ചാക്കോയുടെ പ്രതികരണം. വരും ദിവസങ്ങളിൽ കൂടുതൽ പേർ എൻസിപിയിൽ ചേരുമെന്നും എൻസിപി നേതൃത്വം അവകാശപ്പെടുന്നു.
Also Read: താനൂരിൽ പെട്രോൾ ടാങ്കർ അപകടം; ഇന്ധന ചോർച്ച, ആളുകളെ മാറ്റി പാർപ്പിച്ചു