തിരുവനന്തപുരം: തിരുവനന്തപുരം സര്ക്കാര് മെഡിക്കല് കോളേജ് സന്ദര്ശിച്ച് പ്രവര്ത്തനങ്ങൾ വിലയിരുത്തി ആരോഗ്യവകുപ്പ് മന്ത്രി വീണ ജോര്ജ്. കോവിഡ് വാര്ഡ്, കോവിഡ് ഐസിയു എന്നിവ നേരിട്ട് സന്ദര്ശിക്കുകയും, കേസ് ഷീറ്റുകള് പരിശോധിക്കുകയും സീനിയര് ഡോക്ടർമാരുടെ സന്ദര്ശന സമയം ഉള്പ്പടെയുള്ളവ വിലയിരുത്തുകയും ചെയ്തു. കൂടാതെ അത്യാഹിത വിഭാഗം, മള്ട്ടി സ്പെഷ്യാലിറ്റി ബ്ളോക്ക്, സൂപ്പര് സ്പെഷ്യാലിറ്റി ബ്ളോക്ക് എന്നിവിടങ്ങളിലെ വിവിധ വിഭാഗങ്ങള് മന്ത്രി സന്ദര്ശിക്കുകയും പ്രവര്ത്തനം നേരില് കാണുകയും ചെയ്തു.
സൂപ്പര് സ്പെഷ്യാലിറ്റി ബ്ളോക്കിലെ കരള്മാറ്റി വെക്കൽ ശസ്ത്രക്രിയക്ക് സജ്ജമാക്കുന്ന ലിവര് ട്രാൻസ്പ്ളാന്റ് ഐസിയു, ഓപ്പറേഷന് തിയേറ്റർ എന്നിവ മന്ത്രി പരിശോധിച്ചു. എത്രയും വേഗം കരള് മാറ്റിവെക്കൽ ശസ്ത്രക്രിയക്കുള്ള സൗകര്യങ്ങളൊരുക്കാന് മന്ത്രി നിര്ദ്ദേശം നല്കുകയും ചെയ്തു. അത്യാഹിത വിഭാഗം സന്ദര്ശിക്കുന്ന സമയത്ത് ചില രോഗികളുടെ ബന്ധുക്കള് തങ്ങളെ ലിഫ്റ്റില് കയറ്റുന്നില്ലെന്ന് മന്ത്രിയോട് പരാതി പറയുകയും, ഉടൻ തന്നെ അതിന് പരിഹാരം കാണുകയും ചെയ്തു. ഇക്കാര്യം ശ്രദ്ധിക്കണമെന്ന് ആശുപത്രി അധികൃതര്ക്ക് മന്ത്രി നിര്ദ്ദേശവും നല്കി.
മെഡിക്കല് കോളേജുകളുടെ പ്രവര്ത്തനം മെച്ചപ്പെടുത്തുന്നതിനും വിദഗ്ധ ചികിൽസ ഉറപ്പാക്കുന്നതിനും അക്കാഡമിക് നിലവാരം ഉയര്ത്തുന്നതിനും വേണ്ടി രൂപീകരിച്ച കമ്മിറ്റിയുടെ തീരുമാനങ്ങള് നടപ്പിലാക്കുന്നുണ്ടോ എന്ന് പരിശോധിക്കാന് കൂടിയാണ് സന്ദര്ശനം നടത്തിയതെന്ന് മന്ത്രി വീണാ ജോര്ജ് വ്യക്തമാക്കി. ആരോഗ്യ വകുപ്പ് അഡീഷണല് ചീഫ് സെക്രട്ടറി, മെഡിക്കല് വിദ്യാഭ്യാസ വകുപ്പ് ഡയറക്ടർ, തിരുവനന്തപുരം മെഡിക്കല് കോളേജ് പ്രിന്സിപ്പല്, സൂപ്രണ്ട്, കോട്ടയം മെഡിക്കല് കോളേജ് സൂപ്രണ്ട് ഡോ. ടികെ ജയകുമാര്, തൃശൂര് മെഡിക്കല് കോളേജിലെ ഡോ. രവീന്ദ്രന് എന്നിവര് ഈ കമ്മിറ്റിയിലുണ്ട്. മെഡിക്കല് കോളേജിലെ കാര്യങ്ങളാണ് ഈ കമ്മിറ്റി പരിശോധിക്കുന്നത്.
ഒരു രോഗി അത്യാഹിത വിഭാഗത്തിലെത്തിയാല് സമയം വൈകാതെ വിദഗ്ധ ചികിൽസ ഉറപ്പാക്കണം. കാര്ഡിയോളജിക്ക് ശക്തമായ ഒരു ടീമിനെ അത്യാഹിത വിഭാഗത്തില് സജ്ജമാക്കണം. സ്ട്രോക്ക് ചികിൽസ ഉറപ്പാക്കണം. സ്ട്രോക്ക് കാത്ത്ലാബ് ഏപ്രില് മാസത്തോടെ പ്രവര്ത്തന സജ്ജമാക്കും. അത്യാഹിത വിഭാഗത്തിലും കോവിഡ് വാര്ഡുകളിലും സീനിയര് ഡോക്ടർമാരുടെ സേവനം ഉണ്ടാകണമെന്നും മന്ത്രി വ്യക്തമാക്കി.
മെഡിക്കല് കോളേജിന്റെ പ്രവര്ത്തനങ്ങള് മെച്ചപ്പെടുത്തുന്നതിന്റെ ഭാഗമായി തുടര്ച്ചയായ ഇടപെടലുകളാണ് സർക്കാരിന്റെ ഭാഗത്ത് നിന്നും നടത്തി വരുന്നത്. പല തവണ മെഡിക്കല് കോളേജ് സന്ദര്ശിക്കുകയും മീറ്റിംഗ് വിളിച്ച് കൂട്ടുകയും ചെയ്തിട്ടുണ്ട്. എത്രയും വേഗം മെഡിക്കല് കോളേജില് കരള് മാറ്റിവെക്കൽ ശസ്ത്രക്രിയ ആരംഭിക്കാന് കഴിഞ്ഞ ദിവസം തീരുമാനിച്ചിരുന്നു. മെഡിക്കല് കോളേജ് പ്രിന്സിപ്പല് ഡോ. സാറ വര്ഗീസ്, ആശുപത്രി സൂപ്രണ്ട് ഡോ. നിസാറുദ്ദീന്, ഡെപ്യൂട്ടി സൂപ്രണ്ടുമാരായ ഡോ. ജോബി ജോണ്, ഡോ. അനില് സുന്ദരം, വിവിധ വകുപ്പ് മേധാവികള് എന്നിവര് മന്ത്രിയോടൊപ്പമുണ്ടായിരുന്നു.
Read also: മുല്ലപ്പെരിയാറിൽ പുതിയ ഡാം; നയപ്രഖ്യാപന പ്രസംഗത്തിനെതിരെ തമിഴ്നാട് സുപ്രീം കോടതിയിലേക്ക്
