കീവ്: യുക്രൈന്റെ കിഴക്കന് മേഖലകളില് റഷ്യയുടെ ഷെല്ലാക്രമണം. ഇതുവരെ 21 പേര് മരിച്ചെന്നാണ് പ്രാദേശിക ഭരണകൂടത്തിന്റെ കണക്ക്. അധിനിവേശം ശക്തമായി തുടരുന്ന സാഹചര്യത്തില് കൂടുതല് ചെച്നിയന് സൈനികര് യുക്രൈന് അതിര്ത്തിയിലേക്ക് എത്തിക്കൊണ്ടിരിക്കുകയാണെന്നും റിപ്പോര്ട്ടുകളുണ്ട്.
ഇതിനിടെ ആയിരക്കണക്കിന് പേര്ക്ക് രക്ഷാകേന്ദ്രമായിരുന്ന മരിയുപോളിലെ ഒരു തിയേറ്ററിനുനേരെ റഷ്യന് സൈന്യം ആക്രമണം നടത്തിയതായും യുക്രൈന് ആരോപിച്ചു. റഷ്യന് വിമാനമെത്തി നാടക തിയേറ്ററിന്റെ മധ്യഭാഗം തകര്ത്തെന്നാണ് മരിയുപോള് സിറ്റി കൗണ്സിലര് ആരോപിച്ചിരിക്കുന്നത്. ആയിരങ്ങള്ക്ക് രക്ഷയായിരുന്ന ഈ കെട്ടിടം തകര്ക്കാനുള്ള റഷ്യയുടെ മനപൂര്വമായ ശ്രമം അങ്ങേയറ്റം മനുഷ്യത്വ രഹിതമാണെന്ന് കൗണ്സിലര് പറഞ്ഞു.
അധിനിവേശത്തിന്റെ 21ആം ദിനം പിന്നിടുമ്പോൾ യുക്രൈന്റെ കൂടുതല് നഗരങ്ങളിലേക്ക് ആക്രമണം വ്യാപിപ്പിക്കുകയാണ് റഷ്യ. കരിങ്കടലിന്റെ നിയന്ത്രണം കഴിഞ്ഞ ദിവസം റഷ്യന് സേന ഏറ്റെടുത്തിരുന്നു. ഇതോടെ യുക്രൈന്റെ കടല്വഴിയുള്ള അന്താരാഷ്ട്ര വ്യാപാരവും നിലച്ചിരിക്കുകയാണ്.
തലസ്ഥാനമായ കീവിലും സമീപപ്രദേശങ്ങളിലും റഷ്യകനത്ത ആക്രമണം തുടരുകയാണ്. വന് നഗരങ്ങള് വൈകാതെ കീഴടക്കുമെന്ന് റഷ്യന് പ്രതിരോധ വക്താവ് പറഞ്ഞു. കീവിലെ പാര്പ്പിട സമുച്ചയത്തിന് നേരെ കഴിഞ്ഞ ദിവസം നടന്ന ഷെല്ലാക്രമണത്തില് ഒരാള് കൊല്ലപ്പെട്ടിരുന്നു.
ചെര്ണിവില് ഭക്ഷണം വാങ്ങാന് നിന്നവര്ക്ക് നേരെ റഷ്യന് സൈന്യം വെടിവെച്ചതിനെ തുടര്ന്ന് പത്ത് പേര് കൊല്ലപ്പെട്ടതായി കീവിലെ അമേരിക്കന് എംബസി വാർത്ത പുറത്തുവിട്ടു. ആക്രമണത്തിന്റെ കൂടുതല് വിവരങ്ങള് ലഭ്യമായിട്ടില്ല.
Most Read: സിൽവർ ലൈൻ വിരുദ്ധ പ്രക്ഷോഭം; സഭ ബഹിഷ്കരിച്ച് പ്രതിപക്ഷം
