ന്യൂഡെല്‍ഹി: നവംബര്‍ 26ന് നടക്കാനിരിക്കുന്ന അഖിലേന്ത്യാ പണിമുടക്കിന് പിന്തുണ പ്രഖ്യാപിച്ച് എഐസിസി. ഇതുമായി ബന്ധപ്പെട്ട് എഐസിസി ജനറല്‍ സെക്രട്ടറി കെ സി വേണുഗോപാല്‍ പിസിസി പ്രസിഡണ്ടുമാര്‍ക്കും പാര്‍ലമെന്ററി പാര്‍ട്ടി നേതാക്കള്‍ക്കും കത്തയച്ചു. പണിമുടക്കിനെ എല്ലാ തരത്തിലും സഹായിക്കണമെന്നും വിജയിപ്പിക്കണമെന്നും നിര്‍ദേശിച്ചാണ് കത്ത് നല്‍കിയത്.
ഐഎൻടിയുസി നടത്തുന്ന സമരത്തിന് വര്‍ഷങ്ങള്‍ക്ക് ശേഷമാണ് എഐസിസിയുടെ പിന്തുണ ലഭിക്കുന്നത്. കേന്ദ്ര സര്‍ക്കാര്‍ കൊണ്ടുവന്ന പുതിയ തൊഴില്‍ നിയമങ്ങള്‍ കര്‍ഷകരേയും തൊഴിലാളികളേയും പ്രതിസന്ധിയില്‍ ആക്കുമെന്ന് ചൂണ്ടിക്കാട്ടിയാണ് വിവിധ തൊഴിലാളി സംഘടനകള്‍ 26ന് പണിമുടക്ക് നടത്തുന്നത്.
ഐഎൻടിയുസി നേതാക്കളായ മല്ലികാര്‍ജുന്‍ ഖാര്‍ഗെ, ജയറാം രമേശ്, ജി സഞ്‌ജീവ റെഡ്ഡി, ആര്‍ ചന്ദ്രശേഖരന്‍ എന്നിവര്‍ കഴിഞ്ഞ ദിവസം എഐസിസി നേതൃത്വവുമായി നടത്തിയ ചര്‍ച്ചയെ തുടര്‍ന്നാണ് പണിമുടക്കിനെ പിന്തുണക്കാന്‍ കോണ്‍ഗ്രസ് നേതൃത്വം തീരുമാനിച്ചത്.
Read also: ‘നിവാർ’ ശക്‌തി പ്രാപിച്ചു; തമിഴ്‌നാടിനും പുതുച്ചേരിക്കും സഹായ വാഗ്‌ദാനവുമായി കേന്ദ്രം
