പൂനെ: മഹാരാഷ്ട്രയിലെ സത്താറയിൽ ബിജെപി എംപിയുടെ വീട്ടിൽ നിന്ന് വിലപിടിപ്പുള്ള തോക്ക് മോഷ്ടിച്ച കേസിൽ യുവാവ് പിടിയിൽ. സത്താറ എംപിയായ ഉദയൻ രാജെ ഭോസാലെയുടെ വീട്ടിൽ നിന്നാണ് പുരാതന തോക്ക് മോഷണം പോയത്. സംഭവത്തിൽ പ്രദേശവാസിയായ ദീപക് സുത്താർ എന്നയാളാണ് പിടിയിലായത്.
Also Read: വിജയം മഹാസഖ്യത്തിന് തന്നെ; ബീഹാറില് ആശങ്ക വേണ്ടെന്ന് ആര്ജെഡി
ഭോസാലെയുടെ വീട്ടിൽ ഇയാൾ ഏതാനും ദിവസം ജോലിക്ക് നിന്നിരുന്നു. തോക്ക് നേരത്തെ നോട്ടമിട്ട് വെക്കുകയും പിന്നീട് മോഷ്ടിക്കുകയുമായിരുന്നു. വെള്ളിയിൽ നിർമിതമായ തോക്കിന് ഏതാണ്ട് ഒന്നര ലക്ഷം രൂപയോളം വിലവരും. തോക്ക് ഉപയോഗിക്കാനാവില്ലെങ്കിലും ഇതിന്റെ പഴക്കത്തിനാണ് മൂല്യമുള്ളത്. മോഷ്ടിച്ച തോക്ക് പട്ടണത്തിൽ കൊണ്ടുപോയി വിൽക്കാൻ ശ്രമിക്കുന്നതിനിടെയാണ് പ്രതി പിടിയിലായതെന്ന് പോലീസ് പറഞ്ഞു.