ന്യൂഡെൽഹി: പഞ്ചാബിലെ ഇന്ത്യ-പാക് അതിർത്തിയിൽ ചൈനീസ് നിർമിത ഡ്രോൺ തകർത്തു. വെള്ളിയാഴ്ച രാത്രി 11.10നാണ് ഇന്ത്യൻ അതിർത്തിക്കു 300 മീറ്റർ അടുത്തും അതിർത്തിവേലിക്ക് 150 മീറ്റർ അകലത്തിലുമായി കണ്ട ഡ്രോൺ അതിർത്തി രക്ഷാസേന വെടിവെച്ചിട്ടു.
10 കിലോ ഭാരം വഹിക്കാൻ ശേഷിയുള്ള ഡ്രോണിന് 23 കിലോ ഭാരമുണ്ട്. മുതിർന്ന സൈനിക ഉദ്യോഗസ്ഥർ ഡ്രോൺ പരിശോധന ആരംഭിച്ചതിനൊപ്പം ഡ്രോൺ വഴി എന്തെങ്കിലും വസ്‌തുക്കൾ നിക്ഷേപിച്ചിരുന്നോ എന്നത് കണ്ടെത്താൻ തിരച്ചിലും ആരംഭിച്ചു.
പാകിസ്‌ഥാൻ ഡ്രോൺ ഉപയോഗിച്ച് ഭീകരർക്ക് ആയുധങ്ങളും മയക്കുമരുന്നും എത്തിക്കുന്നതിനെതിരെ സൈന്യം ജാഗ്രതയിലാണ്. ഈ വർഷം മാത്രം അതിർത്തി മേഖലയിൽ 67 തവണ ഡ്രോൺ സാന്നിധ്യം കണ്ടതായി സൈനിക വക്‌താവ് അറിയിച്ചു.
Read also: ചിലർ സ്‍ത്രീകളുടെ സ്വാതന്ത്ര്യത്തിനും അന്തസിനും തടസമാണ്; കേന്ദ്രമന്ത്രി
