തിരുവനന്തപുരം: പാലക്കാട് മുൻ എംഎൽഎ രാഹുൽ മാങ്കൂട്ടത്തിലിനെതിരായ രണ്ട് ബലാൽസംഗ കേസുകളിൽ പോലീസ് കരട് കുറ്റപത്രം തയ്യാറാക്കി. കുറ്റപത്രം നിയമോപദേശത്തിനായി കൈമാറി. രാഹുലിനെതിരെ രജിസ്റ്റർ ചെയ്ത മൂന്ന് കേസുകളിൽ ഒന്നിൽ നേരത്തെ കുറ്റപത്രം സമർപ്പിച്ചിരുന്നു.
തിരുവനന്തപുരം സ്വദേശിനിയായ യുവതിയെ വിവാഹ വാഗ്ദാനം നൽകി പീഡിപ്പിച്ചെന്ന കേസിലാണ് ഇപ്പോൾ കുറ്റപത്രം തയ്യാറാക്കിയത്. ഈ കേസിൽ രാഹുൽ മുൻകൂർ ജാമ്യം തേടിയിരുന്നു. ഹൈക്കോടതി ജാമ്യം അനുവദിച്ചിരുന്നു. ബലാൽസംഗം, നിർബന്ധിത ഗർഭഛിത്രം, ഭ്രൂണഹത്യ, ശാരീരിക ഉപദ്രവം തുടങ്ങിയ വകുപ്പുകളാണ് കേസിൽ ചുമത്തിയിരിക്കുന്നത്.
ബെംഗളൂരുവിൽ പഠിക്കുന്ന യുവതിയെ നാട്ടിലേക്ക് വരുന്ന വഴിക്ക് ഹോട്ടലിലെത്തിച്ച് പീഡിപ്പിച്ചെന്നാണ് മറ്റൊരു കേസ്. ഈ രണ്ട് കേസിലുമാണ് ഇപ്പോൾ കുറ്റപത്രം തയ്യാറാക്കി നിയമോപദേശത്തിന് അയച്ചത്. അതേസമയം, അന്വേഷണ ചുമതലയുണ്ടായിരുന്ന എഐജി ജി. പൂങ്കുഴലിക്ക് കേന്ദ്ര ഡെപ്യൂട്ടേഷൻ ലഭിച്ചതിനെ തുടർന്ന് ചുമതല ഒഴിഞ്ഞിരുന്നു. എന്നാൽ, കുറ്റപത്രം തയ്യാറായ സാഹചര്യത്തിൽ പകരം മറ്റൊരാൾക്ക് അന്വേഷണച്ചുമതല നൽകേണ്ടതില്ലെന്നാണ് പോലീസിന്റെ തീരുമാനം.
Most Read| പാറയുടെ മധ്യത്തിൽ മൽസ്യാകൃതിയിൽ കുളം; കൊടും വരൾച്ചയിലും വറ്റാറില്ല!



































