ഇരിട്ടി: ഇരുമ്പ് പണിക്കാരന്റെ പണിയായുധങ്ങൾ മോഷണം പോയതായി പരാതി. കണ്ണൂർ ഇരിട്ടി പാലത്തിന് സമീപം കൊല്ലപ്പണി എടുക്കുന്ന വിളക്കോട് ഉവ്വാപള്ളി സ്വദേശി പുതിയ പുരയിൽ പിപി രമേശനാണ് പണിസ്ഥലത്ത് സൂക്ഷിച്ച ആയുധങ്ങൾ മോഷണം പോയതായി പോലീസിൽ പരാതി നൽകിയത്. ലോക്ക്ഡൗൺ നിയന്ത്രണങ്ങളെ തുടർന്ന് തൊഴിലെടുക്കാൻ സാധിക്കാത്തതിനാൽ പണിശാല അടച്ചിട്ടതായിരുന്നു.
കഴിഞ്ഞ ദിവസം പരിസരത്തെ മിൽമ ബൂത്തിൽ മോഷണശ്രമം നടന്നതായ വിവരത്തെ തുടർന്ന് പണിശാലയിൽ വന്ന് നോക്കിയപ്പോഴാണ് പണിയായുധങ്ങൾ ഉൾപ്പടെ ഇരുമ്പ് സാധനങ്ങൾ എല്ലാം മോഷണം പോയതായി അറിയുന്നത്. പണിയായുധങ്ങളും ഇരുമ്പുപണി ചെയ്യുന്നതിനായി മറ്റുള്ളവർ ഏൽപിച്ച ആയുധങ്ങളുമാണ് മോഷണം പോയതെന്ന് രമേശൻ പറഞ്ഞു. സംഭവത്തിൽ ഇരിട്ടി പോലീസ് കേസെടുത്ത് അന്വേഷണം ആരംഭിച്ചു.
Read also: കുതിരാൻ തുരങ്കം അടിയന്തരമായി തുറക്കാൻ നടപടി; മന്ത്രിമാർ സന്ദർശനം നടത്തി