കരിപ്പൂര്‍ : കരിപ്പൂരില്‍ വിമാനാപകടത്തില്‍ രക്ഷാപ്രവര്‍ത്തനം നടത്തിയ 53 പേര്‍ക്ക് കോവിഡ് സ്ഥിരീകരിച്ചു. രക്ഷാപ്രവര്‍ത്തനത്തില്‍ പങ്കെടുത്ത പോലീസ് ഉദ്യോഗസ്ഥര്‍, അഗ്‌നിശമന വിഭാഗം ജീവനക്കാര്‍, ആരോഗ്യപ്രവര്‍ത്തകര്‍, മാദ്ധ്യമപ്രവര്‍ത്തകര്‍ എന്നിവരുള്‍പ്പെടെയുള്ളവര്‍ക്കാണ് കോവിഡ് സ്ഥിരീകരിച്ചത്.
രക്ഷാപ്രവര്‍ത്തനം നടത്തിയ 1017 പേരുടെ സാമ്പിളുകളാണ് പരിശോധനയ്ക്കയച്ചത്. ഇതില്‍ 877 പേരുടെ ഫലമാണ് ഇപ്പോള്‍ പുറത്തു വന്നത്. ഇവരിലാണ് 53 പേര്‍ക്ക് രോഗം സ്ഥിരീകരിച്ചത്. രക്ഷാപ്രവര്‍ത്തനത്തിന് നേതൃത്വം നല്‍കിയ മലപ്പുറം ജില്ലാ കളക്ടര്‍, അസിസ്റ്റന്റ് കളക്ടര്‍, സബ് കളക്ടര്‍, എഎസ്പി തുടങ്ങിയവര്‍ക്ക് നേരത്തെ തന്നെ കോവിഡ് സ്ഥിരീകരിച്ചിരുന്നു. ഇതിനെ തുടര്‍ന്ന് വിമാനത്താവളം സന്ദര്‍ശിച്ച മുഖ്യമന്ത്രി ഉള്‍പ്പെടെ എട്ട് മന്ത്രിമാര്‍ സ്വയം നിരീക്ഷണത്തില്‍ പോയിരുന്നു. അവരുടെ പരിശോധനഫലം നെഗറ്റീവ് ആയി സ്ഥിരീകരിച്ചു.
കഴിഞ്ഞ ഓഗസ്റ്റ് 7 നാണ് കരിപ്പൂര്‍ വിമാനത്താവളത്തില്‍ അപകടം ഉണ്ടായത്. ദുബായ് – കോഴിക്കോട് എയര്‍ ഇന്ത്യ എക്‌സ്‌പ്രെസ്സ് വിമാനം ലാന്‍ഡിങ്ങിനിടെ നിയന്ത്രണം വിട്ട് അപകടത്തില്‍പ്പെടുകയായിരുന്നു. അപകടത്തില്‍ പൈലറ്റ് ഉള്‍പ്പെടെ 19 പേര്‍ മരിച്ചു.
