കേപ് ടൗൺ: ‘ഇതൊരു അവിശ്വസനീയമായ യാത്രയായിരുന്നു. പക്ഷേ, എല്ലാ ക്രിക്കറ്റിൽ നിന്നും വിരമിക്കാൻ ഞാൻ തീരുമാനിച്ചിരിക്കുന്നു’; ആരാധകരുടെ പ്രിയപ്പെട്ട എബിഡി വിരമിക്കൽ പ്രഖ്യാപിച്ചു. ഇൻസ്‌റ്റഗ്രാമിലൂടെയാണ് സൗത്ത് ആഫ്രിക്കൻ താരമായ എബ്രഹാം ബഞ്ചമിൻ ഡിവില്ലിയേഴ്‌സ്‌ (എബിഡി) വിരമിക്കൽ പ്രഖ്യാപിച്ചത്.
‘എന്റെ സഹോദരങ്ങളോടൊത്ത് മൈതാനത്ത് കളിക്കാൻ തുടങ്ങിയത് മുതൽ ക്രിക്കറ്റ് ഒരു അടങ്ങാത്ത ആവേശമായി മാറി. ഇപ്പോൾ എനിക്ക് 37 വയസാണ്. ആ കനൽ പഴയത് പോലെ ജ്വലിക്കുന്നില്ല. അത് ഞാൻ അംഗീകരിക്കുന്നു. അതിനാൽ തന്നെയാണ് ഈ പ്രഖ്യാപനം. വളരെ നല്ലൊരു സമയമാണ് എനിക്ക് ലഭിച്ചത്’; എബിഡി പറഞ്ഞു.
സഹതാരങ്ങൾക്കും കോച്ചിനും ആരാധകർക്കും അദ്ദേഹം നന്ദി പറഞ്ഞു. ഇനി കുടുംബത്തോടൊപ്പം പുതിയൊരു അധ്യായം തുടങ്ങണമെന്നും അദ്ദേഹം കൂട്ടിച്ചേർത്തു.
ആധുനിക ക്രിക്കറ്റ് ലോകത്തിന് ഒരുപിടി നല്ല ഓർമകൾ സമ്മാനിച്ച ഒരു ജീനിയസ് ആയിരുന്നു എബി ഡിവില്ലിയേഴ്‌സ്‌ എന്ന് നിസംശയം പറയാം. ദൗർഭാഗ്യവാനായ പ്രതിഭാശാലി എന്നായിരുന്നു അദ്ദേഹത്തെ ക്രിക്കറ്റ് ലോകം വിശേഷിപ്പിച്ചിരുന്നത്. അങ്ങേയറ്റം തന്റെ പ്രതിഭയോട് കൂറുപുലർത്തിയിട്ടും സൗത്ത് ആഫ്രിക്കക്ക് വേണ്ടി ഒരു കപ്പ് നേടുക എന്ന അദ്ദേഹത്തിന്റെ സ്വപ്‌നം സഫലമാകാതെ പോയി.
കപ്പുകളുടെ എണ്ണത്തേക്കാൾ അദ്ദേഹത്തിന്റെ പ്രകടനങ്ങളാണ് ആരാധകർ ഇപ്പോഴും ഓർമയിൽ സൂക്ഷിക്കുന്നത്. വിരമിക്കൽ പ്രഖ്യാപിച്ചതിന് പിന്നാലെ ഏറെ സങ്കടത്തോടെയുള്ള പ്രതികരണങ്ങളാണ് ആരാധകരുടെ ഭാഗത്ത് നിന്ന് ഉണ്ടായിരിക്കുന്നത്. ഐപിഎല്ലിൽ ഇന്ത്യൻ കാണികൾക്ക് ഏറെ സ്വീകാര്യനായ വിദേശ കളിക്കാരൻ കൂടിയായിരുന്നു എബിഡി.
View this post on Instagram
Also Read: മോദിയെ വിശ്വാസമില്ല; പാർലമെന്റിൽ നിയമം റദ്ദാക്കുന്നത് വരെ കർഷക സമരം തുടരും
