മലപ്പുറം: ജില്ലയിൽ ഗ്രാമപഞ്ചായത്ത് പ്രസിഡണ്ടുമാരുടെ സമരം. കോവിഡ് വാക്സിൻ വിതരണത്തിൽ ക്രമക്കേട് ആരോപിച്ചാണ് മലപ്പുറം ജില്ലയിലെ മുസ്ലിം ലീഗ് ഭരണസമിതിയുള്ള പഞ്ചായത്ത് പ്രസിഡണ്ടുമാർ പ്രതിഷേധം നടത്തിയത്. കളക്റ്ററേറ്റിന് മുന്നിലാണ് പ്രതിഷേധം സംഘടിപ്പിച്ചത്. ജനസംഖ്യാനുപാതികമായി ജില്ലയ്ക്ക് വാക്സിൻ അനുവദിക്കണമെന്നാണ് ആവശ്യം.
കേരളത്തിൽ ഏറ്റവും കൂടുതൽ ജനസംഖ്യയുള്ള ജില്ലയാണ് മലപ്പുറം. എന്നാൽ, വാക്സിൻ വിതരണത്തിൽ ഈ പരിഗണന ലഭിക്കുന്നില്ലെന്നാണ് പ്രതിഷേധക്കാർ പറയുന്നത്. ജില്ലയിലെ ഓരോ പഞ്ചായത്തിലും ജനസംഖ്യ അനുസരിച്ച് ആനുപാതികമായി വാക്സിൻ വിതരണം ചെയ്യണമെന്നാണ് ഇവരുടെ ആവശ്യം. അതേസമയം, ലഭിക്കുന്ന വാക്സിൻ ഡോസിന്റെ എണ്ണത്തിലും അനിശ്ചിതത്വം ഉണ്ടെന്ന് പ്രതിഷേധക്കാർ ആരോപിച്ചു.
ചിലയിടങ്ങളിൽ വാക്സിനോടൊപ്പം സിറിഞ്ചുകൾ ലഭിക്കാറില്ലെന്നും, ഇത് വാക്സിനേഷൻ മുടങ്ങാൻ കാരണമാകാറുണ്ടെന്നും ഇവർ പറഞ്ഞു. ഇത് പലതവണ ആരോഗ്യ വകുപ്പിന്റെ ശ്രദ്ധയിൽപ്പെടുത്തിയിട്ടും ഇതുവരെ പരിഹാരം കാണാനായില്ല. അധികൃതരുടെ ഇത്തരം അനാസ്ഥകളിൽ പ്രതിഷേധിച്ചാണ് പ്രത്യക്ഷ സമരവുമായി രംഗത്തെത്തിയതെന്ന് പ്രസിഡണ്ടുമാരുടെ കൂട്ടായ്മ അറിയിച്ചു.
Read Also: മുസ്ലിം ലീഗ് ഉന്നതാധികാര യോഗം ഇന്ന് മലപ്പുറത്ത് ചേരും