തിരുവനന്തപുരം: സംസ്ഥാന പോലീസ് മേധാവിയെ തിരഞ്ഞെടുക്കുന്നതിനായി തയ്യാറാക്കിയ ഉദ്യോഗസ്ഥരുടെ പട്ടിക സർക്കാർ വീണ്ടും വെട്ടിച്ചുരുക്കി. കേന്ദ്ര നിർദ്ദേശത്തെ തുടർന്നാണ് നീക്കം.
പോലീസ് മേധാവി നിയമനത്തിനായി സംസ്ഥാനം അയച്ച 12 പേരുടെ പട്ടിക കേന്ദ്രം നേരത്തെ മടക്കി അയച്ചിരുന്നു. 30 വർഷം പൂർത്തിയാക്കിയവരുടെ പേരുകളും പട്ടികയിൽ ഉൾപ്പെട്ടതാണ് ഇതിന് കാരണം. ഇതിനെ തുടർന്ന് 3 ഉദ്യോഗസ്ഥരെ ഒഴിവാക്കിയുള്ള പുതുക്കിയ പട്ടിക സംസ്ഥാന പൊതുഭരണവകുപ്പ് കേന്ദ്രത്തിന് കൈമാറി. 1991 ഐപിഎസ് ബാച്ചിലുള്ള സഞ്ജിബ് കുമാർ പട്ജോഷി, റവദ ചന്ദ്രശേഖർ എന്നിവരെയാണ് ഒഴിവാക്കിയത്. പോലീസ് അക്കാദമി ഡയറക്ടറും ട്രെയിനിങ് മേധാവിയുമായ ഷെയ്ഖ് ദർവേഷ് സാഹിബിനെയും പട്ടികയിൽ നിന്ന് ഒഴിവാക്കിയെന്നാണ് സൂചന.
അരുൺ കുമാർ സിൻഹ, ടോമിൻ ജെ തച്ചങ്കരി, സുധേഷ് കുമാർ അടക്കമുള്ള ഉദ്യോഗസ്ഥർ പുതുക്കിയ പട്ടികയിൽ ഇടം പിടിച്ചിട്ടുണ്ട്. 9 പേരെയാണ് പുതുക്കിയ പട്ടികയിൽ ഉൾപ്പെടുത്തിയിട്ടുള്ളത്. ഇവരിലൊരാളാകും അടുത്ത സംസ്ഥാന പോലീസ് മേധാവി എന്നാണ് പ്രതീക്ഷിക്കുന്നത്.
യുപിഎസ്സിയുടെ തിരഞ്ഞെടുപ്പ് സമിതി യോഗം ചേർന്ന് 3 പേരുടെ ഒരു അന്തിമ പട്ടിക തയ്യാറാക്കേണ്ടതുണ്ട്. ഈ അന്തിമ പട്ടിക സംസ്ഥാനത്തിന് കൈമാറും. ഇതിൽ നിന്നാണ് ജൂൺ അവസാനത്തോടെ പുതിയ പോലീസ് മേധാവിയെ തിരഞ്ഞെടുക്കുക.
Read also: അനൂപ് ചന്ദ്ര പാണ്ഡെയെ കേന്ദ്ര തിരഞ്ഞെടുപ്പ് കമ്മീഷണറായി നിയമിച്ചു