കാസർഗോഡ്: പാണത്തൂർ പരിയാരത്ത് ലോറി അപകടത്തിൽപെട്ട് മരണമടഞ്ഞവരുടെ കുടുംബങ്ങൾക്ക് കൈത്താങ്ങായി രാജ്‌മോഹൻ ഉണ്ണിത്താൻ എംപി. തനിക്ക് ലഭിച്ച ഓണറേറിയത്തിൽനിന്ന്‌ 10,000 രൂപ വീതം എംപി തൊഴിലാളികളുടെ കുടുംബങ്ങൾക്ക് നൽകി. തുകയുടെ ചെക്ക് പഞ്ചായത്ത് പ്രസിഡണ്ട് പ്രസന്നാ പ്രസാദിനെ ഏൽപിച്ചു.
വെള്ളിയാഴ്‌ച രാവിലെ 12 മണിയോടെയാണ് എംപി പാണത്തൂർ കുണ്ടുപ്പള്ളിയിലെ മരണമടഞ്ഞ തൊഴിലാളികളുടെ വീട്ടിൽ എത്തിയത്. രണ്ടുമണിയോടെയാണ് അദ്ദേഹം തിരിച്ചുപോയത്.
അപകടത്തിൽ മരണമടഞ്ഞവരുടെ കുടുംബങ്ങളെ സഹായിക്കാൻ പഞ്ചായത്തുതലത്തിൽ സർവകക്ഷിയോഗം വിളിച്ചുചേർത്ത് സഹായമൊരുക്കാൻ കഴിയണമെന്നും എംപി പറഞ്ഞു. മുഖ്യമന്ത്രിയുടെ ദുരിതാശ്വാസനിധിയിൽനിന്നും സഹായം ലഭ്യമാക്കാൻ ഇടപെടുമെന്നും കുടുംബാംഗങ്ങൾക്ക് ഉറപ്പ് നൽകി.
അപകടം നടന്ന പരിയാരത്തും സന്ദർശനം നടത്തി. നിരന്തരം അപകടം നടക്കുന്ന പാണത്തൂർ പരിയാരത്ത് റോഡിന്റെ അപാകത പരിഹരിക്കാൻ ആവശ്യമായ നടപടിയെടുക്കുമെന്നും എംപി പറഞ്ഞു.
Malabar News: ബേപ്പൂര്‍ വാട്ടര്‍ ഫെസ്‌റ്റിന് തുടക്കമായി; ഉൽഘാടനം നിർവഹിച്ച് മമ്മൂട്ടി
