തിരുവനന്തപുരം: സ്വകാര്യ വാഹനങ്ങളിലും ടാക്സികളിലും യാത്ര ചെയ്യുന്നവർ നിർബന്ധമായും മാസ്ക് ധരിക്കണമെന്ന് മുഖ്യമന്ത്രി പിണറായി വിജയൻ. കോവിഡ് സാഹചര്യം രൂക്ഷമാകുന്ന സാഹചര്യത്തിൽ കാറുകളിലും മറ്റ് സ്വകാര്യ വാഹനങ്ങളിലും യാത്ര ചെയ്യുന്നവർ മാസ്ക് ധരിക്കാത്ത പ്രവണത കണ്ടുവരുന്നു. ഇത് പൂർണമായും ഒഴിവാക്കണം. ഇത്തരം അശ്രദ്ധകൾ നാം കൈവരിച്ച് കൊണ്ടിരിക്കുന്ന നേട്ടങ്ങളെ ഇല്ലാതാക്കുമെന്ന് മുഖ്യമന്ത്രി പറഞ്ഞു.
കൂടാതെ, ഡ്രൈവിങ് സ്കൂളുകളിലും കോവിഡ് മാനദണ്ഡങ്ങൾ കൃത്യമായി പാലിക്കണം. വിദ്യാർഥികളും പഠിപ്പിക്കുന്നയാളും നിർബന്ധമായും മാസ്കും കയ്യുറകളും ധരിക്കണം. കൃത്യമായി അകലം പാലിച്ച് ഇരിക്കാൻ കഴിയുന്നത്ര ആളുകളെ മാത്രമേ ഒരേ സമയം വാഹനത്തിൽ പ്രവേശിക്കാൻ പാടുള്ളൂ. ബന്ധപ്പെട്ട ഉദ്യോഗസ്ഥർ ഇക്കാര്യങ്ങൾ പരിശോധിച്ച് ഉറപ്പ് വരുത്തണം.
Also Read: ഡിസംബറിലെ പിഎസ്സി പരീക്ഷകള് മാറ്റി
അതേസമയം, വിവാഹ ചടങ്ങുകളിൽ കോവിഡ് മാനദണ്ഡം ഉറപ്പ് വരുത്തുന്നത് അതിഥിയുടെയും ആതിഥേയന്റെയും ഉത്തരവാദിത്തമാണ്. ഇത്തരം ചടങ്ങുകൾ സെക്റ്ററൽ മജിസ്ട്രേറ്റുമാർ കൃത്യമായി നിരീക്ഷിക്കുകയും മാർഗ നിർദ്ദേശങ്ങൾ നൽകുകയും വേണമെന്ന് മുഖ്യമന്ത്രി പറഞ്ഞു.