ന്യൂഡല്ഹി: മുല്ലപ്പെരിയാര് അണക്കെട്ടിന്റെ ജലനിരപ്പ് സംബന്ധിച്ച് ആശങ്കകള്ക്ക് അടിസ്ഥാനമില്ലെന്ന് ദേശീയ ജല കമ്മീഷന് സുപ്രീംകോടതിയില്. അണക്കെട്ടിലെ ജലനിരപ്പ് സംബന്ധിച്ച ആശങ്കയില് സമര്പ്പിച്ച ഹര്ജി പരിഗണിക്കുകയായിരുന്നു കോടതി. നിലവില് ജലനിരപ്പ് 130 അടിയാണെന്നും ദേശീയ ജല കമ്മീഷന് വേണ്ടി ഹാജരായ അറ്റോര്ണി ജനറല് കെ.കെ. വേണുഗോപാല് കോടതിയെ അറിയിച്ചു.
കഴിഞ്ഞ പത്ത് വര്ഷമായി ശരാശരി 123.21 അടിയാണ് ജലനിരപ്പെന്നും ഈ വിഷയത്തില് ഹര്ജിക്കാരന് ഉയര്ത്തുന്ന ആശങ്കയ്ക്ക് അടിസ്ഥാനമില്ലന്നുമാണ് അറ്റോര്ണി ജനറല് വ്യക്തമാക്കിയത്. കാലവര്ഷ സമയത്ത് മുല്ലപ്പെരിയാര് അണക്കെട്ടിലെ ജലനിരപ്പ് 130 അടിയായി കുറയ്ക്കണമെന്ന പൊതുപ്രവര്ത്തകനായ റസല് ജോയിയുടെ ആവശ്യം പരിഗണിക്കുകയായിരുന്നു കോടതി. കേസ് നാലാഴ്ചയ്ക്ക് ശേഷം പരിഗണിക്കാനായി കോടതി മാറ്റി.