കന്നഡ നടനും സംവിധായകനും നിർമാതാവുമായ രക്ഷിത് ഷെട്ടി നായകനായെത്തുന്ന ചിത്രം ‘777 ചാർളി’യിലെ പുതിയ ഗാനത്തിന്റെ ലിറിക്കൽ വീഡിയോ പുറത്തുവിട്ടു. മലയാളിയായ കിരൺ രാജ് സംവിധാനം ചെയ്യുന്ന ചിത്രം ജൂണ്‍ നാളെ പ്രദര്‍ശനത്തിനെത്തും.
‘എൻ സർവമേ’ എന്ന് തുടങ്ങുന്ന ഗാനമാണ് അണിയറ പ്രവർത്തകർ ഇപ്പോൾ പുറത്തുവിട്ടത്. ഗാനത്തിന്റെ മലയാളം പതിപ്പ് ആലപിച്ചിരിക്കുന്നത് അനന്യ ആണ്. നോബിള്‍ പോളാണ് സംഗീത സംവിധായകൻ.
ഏകാന്തതയിൽ അകപ്പെടുന്ന നായകന്റെ ജീവിതത്തിലേക്ക് ചാർലി എന്ന നായ കടന്നു വരുന്നതും തുടർന്ന് ഉണ്ടാകുന്ന സംഭവ വികാസങ്ങളുമാണ് ചിത്രം പറയുന്നത്. ‘ധര്‍മ്മ’ എന്നാണ് രക്ഷിത് അവതരിപ്പിക്കുന്ന കഥാപാത്രത്തിന്റെ പേര്.
ചിത്രത്തിന്റെ മലയാളം പതിപ്പ് പൃഥ്വിരാജും, തമിഴ് പതിപ്പ് കാർത്തിക്‌ സുബ്ബരാജും, തെലുങ്ക്‌ പതിപ്പ് നാനിയുമാണ്‌ വിതരണം ഏറ്റെടുത്തിരിക്കുന്നത്‌. അരവിന്ദ് എസ് കശ്യപ് ഛായാഗ്രഹണം നിർവഹിക്കുന്ന ചിത്രത്തിന്റെ എഡിറ്റർ പ്രതീക് ഷെട്ടിയാണ്. വിവിധ ഭാഷകളിലെ സംഭാഷണം ഒരുക്കിയിരിക്കുന്നത് കിരൺരാജ് കെ, രാജ് ബി ഷെട്ടി, അഭിജിത്ത് മഹേഷ് എന്നിവരാണ്‌.
Most Read: മാദ്ധ്യമ പ്രവര്‍ത്തക സബ നഖ്‌വിക്കെതിരെ കേസെടുത്ത് ഡെല്‍ഹി പോലീസ്
