സോൾ: ഉത്തര കൊറിയയിൽ ഇതുവരെ കോവിഡ്-19 റിപ്പോർട്ട് ചെയ്‌തിട്ടില്ലെന്ന് ലോകാരോഗ്യ സംഘടനയുടെ റിപ്പോർട്ട്. ചൊവ്വാഴ്‌ച പുറത്തുവിട്ട ഏറ്റവും പുതിയ റിപ്പോർട്ടിലാണ് ലോകാരോഗ്യ സംഘടന ഇക്കാര്യം പറയുന്നത്. 10,462 പേരെ കോവിഡ് പരിശോധനക്ക് വിധേയരാക്കിയെങ്കിലും ഒക്‌ടോബർ 29 വരെ ഓരാൾക്കു പോലും കോവിഡ് സ്‌ഥിരീകരിച്ചിട്ടില്ലെന്ന് കോവിഡ് വ്യാപനം സംബന്ധിച്ച പ്രതിവാര റിപ്പോർട്ടിൽ ലോകാരോഗ്യ സംഘടന വ്യക്‌തമാക്കി.
നിലവിൽ രോഗബാധ സംശയിക്കുന്ന 5368 പേരിൽ എട്ടു പേർ വിദേശികളാണ്. ഒക്‌ടോബർ 15 മുതൽ 22 വരെ ക്വാറന്റൈനിൽ ആക്കിയ 161 പേരെ പിന്നീട് വിട്ടയച്ചു. ഒക്‌ടോബർ 22 വരെ ഇത്തരത്തിൽ വിട്ടയച്ചത് 32,011 പേരെയാണ്. 846 ഉത്തര കൊറിയൻ പൗരൻമാർക്ക് നേരത്തെ കോവിഡ് സംശയിച്ചിരുന്നു. എന്നാൽ അവരുടെയെല്ലാം പരിശോധനാഫലം നെഗറ്റീവായി എന്നും റിപ്പോർട്ടിൽ പറയുന്നു.
ലോകത്തെ കോവിഡ് വ്യാപനത്തെ തുടർന്ന്, ഉത്തരകൊറിയ മുൻകരുതലിന്റെ ഭാഗമായി അതിർത്തികളെല്ലാം ഈവർഷം ആദ്യം തന്നെ അടച്ചിരുന്നു.
Also Read: ജീവൻ കൈവിടാതെ 65 മണിക്കൂർ; ഭൂകമ്പത്തിൽ കാണാതായ മൂന്ന് വയസുകാരിയെ രക്ഷപെടുത്തി
