മുംബൈ: ബോളിവുഡ് നടൻ ആസിഫ് ബസ്‌റയെ സ്വകാര്യ ഗസ്‌റ്റ്‌ ഹൗസിൽ തൂങ്ങിമരിച്ച നിലയിൽ കണ്ടെത്തി. 53 വയസായിരുന്നു. വെള്ളിയാഴ്‌ച ഹിമാചൽ പ്രദേശ് ധർമശാലയിലെ സ്വകാര്യ ഗസ്‌റ്റ്‌ ഹൗസിലാണ് സംഭവം. പൊലീസും വിരലടയാള വിദഗ്‌ധരും സ്‌ഥലത്തെത്തി പരിശോധന നടത്തി. സംഭവത്തിൽ അന്വേഷണം ആരംഭിച്ചു.
ബോളിവുഡിലെ ശ്രദ്ധേയനായ നടനാണ് ബസ്‌റ. അടുത്തിടെ പുറത്തിറങ്ങിയ പാതാൾ ലോക് എന്ന വെബ് സീരീസിൽ ഇദ്ദേഹം പ്രേക്ഷക ശ്രദ്ധ ആകർഷിച്ചിരുന്നു. ബ്ളാക്ക് ഫ്രൈഡേ, പർസാനിയ, കയ് പോ ചെ, ഹിച്ക്കി തുടങ്ങി നിരവധി ചിത്രങ്ങളുടെ ഭാഗമായിട്ടുണ്ട്. ഇംഗ്ളീഷിലും ഹിന്ദിയിലും ഉറുദുവിലുമായി നിരവധി നാടകങ്ങളിലും ഇദ്ദേഹം അഭിനയിച്ചിട്ടുണ്ട്.
