ന്യൂഡെൽഹി: രാജ്യത്ത് പ്രതിദിനം കോവിഡ് ബാധിതരുടെ എണ്ണത്തിൽ ഉണ്ടാകുന്ന വർധന കണക്കിലെടുത്ത് മുഖ്യമന്ത്രിമാരുടെ യോഗം വിളിച്ച് പ്രധാനമന്ത്രി നരേന്ദ്രമോദി. കഴിഞ്ഞ രണ്ടാഴ്ചയായി രാജ്യ തലസ്ഥാനത്തും മറ്റ് സംസ്ഥാനങ്ങളിലും കോവിഡ് കേസുകളുടെ എണ്ണം ഉയരുന്നുണ്ട്. ഇതിന്റെ പശ്ചാത്തലത്തിലാണ് യോഗം വിളിച്ചിരിക്കുന്നത്.
ബുധനാഴ്ച ഓൺലൈനായാണ് യോഗം ചേരുന്നത്. കഴിഞ്ഞ നാല് ദിവസമായി രാജ്യത്ത് തുടർച്ചയായി 2000ന് മുകളിലാണ് കോവിഡ് കേസുകൾ റിപ്പോർട് ചെയ്യുന്നത്. 2,527 പേർക്കാണ് കഴിഞ്ഞ ദിവസം രോഗം സ്ഥിരീകരിച്ചത്. കൂടാതെ 33 പേർ കോവിഡ് ബാധയെ തുടർന്ന് മരിക്കുകയും ചെയ്തു.
ഡെൽഹിയിൽ പ്രതിദിനം രോഗബാധ വർധിക്കുകയാണ്. 1,042 പേർക്കാണ് കഴിഞ്ഞ ദിവസം ഡെൽഹിയിൽ കോവിഡ് സ്ഥിരീകരിച്ചത്. കൂടാതെ ടെസ്റ്റ് പോസിറ്റിവിറ്റി നിരക്ക് 4.82 ശതമാനമായി ഉയരുകയും ചെയ്തു. ഇതേ തുടർന്ന് കോവിഡ് നിയന്ത്രണങ്ങൾ ഡെൽഹിയിൽ വീണ്ടും കർശനമാക്കുകയും ചെയ്തിട്ടുണ്ട്. പ്രതിദിന കോവിഡ് കേസുകളിലുണ്ടായ വര്ധനയെ തുടര്ന്ന് ഡെൽഹിയിലും ചെന്നൈയിലും മാസ്ക് ധരിക്കുന്നത് വീണ്ടും നിര്ബന്ധമാക്കിയിരുന്നു.
Read also: ജിഎസ്ടി നിരക്ക് വർധനയ്ക്ക് ശുപാർശ; സംസ്ഥാനങ്ങളുടെ നിലപാട് തേടി