ശോഭാ സുരേന്ദ്രനെ ബിജെപിയുടെ സംസ്‌ഥാന കോര്‍ കമ്മിറ്റിയില്‍ ഉള്‍പ്പെടുത്തിയേക്കുമെന്ന് റിപ്പോര്‍ട്ട്. ശോഭാ സുരേന്ദ്രനടക്കമുള്ള മുതിര്‍ന്ന നേതാക്കളെ അനുനയിപ്പിക്കാനുള്ള ശ്രമങ്ങള്‍ പാര്‍ട്ടിക്കുള്ളില്‍ നടക്കുന്നുവെന്നാണ് വിവരം.
സംസ്‌ഥാന ബിജെപിയിലെ പ്രശ്‌നങ്ങള്‍ക്ക് അടിയന്തര പരിഹാരം വേണമെന്ന ദേശീയ നേതൃത്വത്തിന്റെ നിര്‍ദേശത്തിന് പിന്നാലെയാണ് ഒത്തുതീര്‍പ്പ് ശ്രമങ്ങള്‍ തുടങ്ങുന്നത്. നേരത്തെ ഉപാധ്യക്ഷനായിരുന്ന എഎന്‍ രാധാകൃഷ്‌ണനെ ഇത്തരത്തില്‍ കോര്‍ കമ്മിറ്റി അംഗമാക്കി പ്രശ്‌നപരിഹാരം കണ്ടിരുന്നു. ശോഭാ സുരേന്ദ്രനൊപ്പം മറ്റൊരു നേതാവായ പിഎം വേലായുധന്റെ കാര്യത്തിലും തീരുമാനം ഉണ്ടായേക്കും. എപി അബ്‌ദുള്ളക്കുട്ടി ദേശീയ ഉപാദ്ധ്യക്ഷനായ ഒഴിവില്‍ പിഎം വേലായുധനെ പരിഗണിക്കാനാണ് ആലോചന.
Entertainment News: നസ്രിയ നസീം തെലുങ്കിലേക്ക്; ആദ്യ ചുവടുവെപ്പ് നാനിക്കൊപ്പം
അതേസമയം, പാര്‍ട്ടിക്കുള്ളിലെ ഭിന്നതകള്‍ പരസ്യപ്രതികരണം നടത്തിയവര്‍ക്ക് അനൂകൂലമായി തീരുമാനങ്ങള്‍ എടുക്കുന്നത് പിന്നീട് പാര്‍ട്ടിക്ക് ദോഷം ചെയ്യുമെന്ന അഭിപ്രായവും നിലനില്‍ക്കുന്നുണ്ട്. എന്നാല്‍ പ്രശ്‌നപരിഹാരം വേണമെന്ന ആര്‍എസ്എസ് സമ്മര്‍ദം ബിജെപിക്ക് മുകളിലുണ്ട്. അന്തിമ തീരുമാനം തദ്ദേശ തിരഞ്ഞെടുപ്പിന് ശേഷം ബിജെപി കേന്ദ്ര നേതൃത്വം പരിഗണിക്കും.
