മഞ്ചേരി: ഓൺലൈൻ ക്ളാസ് ആരംഭിച്ചിട്ടും പാഠപുസ്തകങ്ങൾ ലഭിക്കാതെ വിഷമിക്കുന്ന കുട്ടികൾക്ക് ആശ്വാസമായി മഞ്ചേരി എച്ച്എംവൈ ഹയർ സെക്കൻഡറി സ്കൂൾ. അധ്യാപകർ നേതൃത്വം നൽകുന്ന പുസ്തക വണ്ടിയിലൂടെ പുസ്തകങ്ങൾ വീട്ടുപടിക്കൽ എത്തിച്ച് നൽകി.
3,300ഓളം കുട്ടികൾ പഠിക്കുന്ന ഹൈസ്കൂൾ, യുപി വിഭാഗങ്ങളിലെ 5 മുതൽ 8 വരെ ക്ളാസുകളിലെ വിദ്യാർഥികൾക്കാണ് ആദ്യഘട്ടത്തിൽ പുസ്തകങ്ങൾ നൽകാൻ ആരംഭിച്ചത്. വീടിനടുത്തുള്ള നിശ്ചിത പോയന്റുകളിൽ വാഹനം എത്തുന്ന വിവരം ക്ളാസ് വാട്സാപ്പ് ഗ്രൂപ്പിലൂടെ അറിയിച്ച് അധ്യാപകരാണ് പാഠപുസ്തക വിതരണത്തിന് നേതൃത്വം നൽകുന്നത്.
പിടിഎ പ്രസിഡണ്ട് പിഎം നാസർ പുസ്തകവണ്ടി ഫ്ളാഗ് ഓഫ് ചെയ്തു. പ്രധാനാധ്യാപകൻ കെഎം അബ്ദുൾ ഷുക്കൂറും ശിഹാർ അരിപ്ര, കമാലുദ്ദീൻ, പി ഷഫീഖ്, എംഎ ഇർഷാദ്, അസീസ്, നിഷാദ്, ഹൈദ്രസ് തുടങ്ങിയവരും പുസ്തക വിതരണത്തിൽ പങ്കെടുത്തു.
Read also: കോൺഗ്രസ് ദുഷ്കരമായ അവസ്ഥയിലാണ്, യുക്തിയുള്ളവർക്ക് അതറിയാം; സൽമാൻ ഖുർഷിദ്