മലപ്പുറം: മകളുടെ സ്ത്രീധന വിഷയത്തെ തുടർന്നുണ്ടായ മനോവിഷമത്തിൽ ആത്മഹത്യ ചെയ്ത മലപ്പുറം മമ്പാട് സ്വദേശി മൂസക്കുട്ടിയുടെ വീട്ടിൽ കേരള ഗവർണർ ആരിഫ് മുഹമ്മദ് ഖാൻ സന്ദർശനം നടത്തി. ഇന്ന് രാവിലെ പത്ത് മണിയോടെയാണ് ഗവർണർ മൂസക്കുട്ടിയുടെ വീട്ടിൽ എത്തിയത്. സ്ത്രീധനത്തിൽ സമൂഹത്തിന്റെ മനോഗതി മാറണമെന്ന് മൂസയുടെ കുടുംബത്തെ സന്ദർശിച്ച ശേഷം ഗവർണർ മാദ്ധ്യമങ്ങളോട് പറഞ്ഞു.
സ്ത്രീധനത്തിനെതിരെ പൊതുസമൂഹം മുന്നോട്ട് വരണമെന്നും പീഡനങ്ങൾ തടയുന്നതിന് സമൂഹത്തിനാണ് വലിയ പങ്ക് വഹിക്കാൻ കഴിയുകയെന്നും ബോധവൽക്കരണത്തിന്റെ ഭാഗമായാണ് മൂസക്കുട്ടിയുടെ വീട് സന്ദർശിച്ചതെന്നും ഗവർണർ പറഞ്ഞു. കഴിഞ്ഞ മാസം 23ന് ആയിരുന്നു മലപ്പുറം മമ്പാട് സ്വദേശി മൂസക്കുട്ടിയെ വീടിന് സമീപത്തെ റബ്ബർ തോട്ടത്തിൽ തൂങ്ങിമരിച്ച നിലയിൽ കണ്ടെത്തിയത്.
തുടർന്ന് നിലമ്പൂർ പോലീസ് നടത്തിയ അന്വേഷണത്തിലാണ് മരണകാരണം വ്യക്തമായത്. മകളെ ഉപദ്രവിച്ചതിലും അപമാനിച്ചതിലുമുള്ള സങ്കടം വീഡിയോയായി മൂസക്കുട്ടി ചിത്രീകരിച്ചിരുന്നു. തുടർന്നാണ് ആത്മഹത്യ ചെയ്തത്. ഈ വീഡിയോ പോലീസ് കണ്ടെത്തിയിരുന്നു. സംഭവത്തിൽ മൂസക്കുട്ടിയുടെ മകളുടെ ഭർത്താവ് അബ്ദുൾ ഹമീദിനെ നേരത്തേ പോലീസ് അറസ്റ്റ് ചെയ്തിരുന്നു.
Most Read: 24 മണിക്കൂറിൽ രാജ്യത്ത് 21,257 കോവിഡ് കേസുകൾ; മരണം 271