നീണ്ട ഇടവേളയ്‌ക്ക് ശേഷം തെന്നിന്ത്യന്‍ ഗായിക രഞ്‌ജിനി ജോസ് ഒരു സോള്‍ഫുള്‍ മെലഡിയുമായി നാളെയെത്തുന്നു. രഞ്‌ജിനിയുടെ പതിവ് അടിച്ചുപൊളി ഗാനങ്ങളില്‍ നിന്ന് തികച്ചും വ്യത്യസ്‌തമാണ്‌ ഈ ഗാനം.
അകലെ നിന്നുരുകും വെണ്‍താരം
അരികെ നിന്നുരുകും നിന്‍ മൗനം…
വിഷാദം പെയ്‌തിറങ്ങുന്ന ഈ ആര്‍ദ്രഗാനം രഞ്‌ജിനിയുടെ സ്വരമാധുരിയിലൂടെ തരളിതമായി ഒഴുകിയെത്തുകയാണ്. രഞ്‌ജിനി ആലപിച്ച പെര്‍ഫ്യൂമിലെ രണ്ടാമത്തെ ഈ ഗാനം ചലച്ചിത്ര രംഗത്തെ പ്രമുഖര്‍ മെയ് 5ന് വൈകീട്ട് റിലീസ് ചെയ്യും.
സംവിധായകന്‍ പികെ ബാബുരാജ്, നടി സുരഭി ലക്ഷ്‌മി, നടന്‍ വിനോദ് കോവൂര്‍ എന്നിവര്‍ തങ്ങളുടെ ഫേസ്ബുക്കിലൂടെയാണ് ഗാനം റിലീസ് ചെയ്യുന്നത്. പ്രണയാതുരമായ ഈ ഗാനത്തിന് സംഗീതം നല്‍കിയത് രാജേഷ് ബാബു കെ ശൂരനാടും വരികളെഴുതിയത് സുജിത്ത് കാറ്റോടുമാണ്.
ടിനി ടോം, പ്രതാപ് പോത്തന്‍, കനിഹ എന്നിവരെ കേന്ദ്രകഥാപാത്രമാക്കി പ്രമുഖ സംവിധായകന്‍ ഹരിദാസ് ഒരുക്കിയ പുതിയ ചിത്രമാണ് പെര്‍ഫ്യൂം. മോത്തി ജേക്കബ് പ്രൊഡക്ഷന്‍സും നന്ദനമുദ്ര ഫിലിംസും സംയുക്‌തമായി ഒരുക്കുന്ന പെര്‍ഫ്യൂം മോത്തി ജേക്കബ് കൊടിയാത്ത്, സുധി എന്നിവര്‍ ചേര്‍ന്നാണ് നിര്‍മിച്ചിരിക്കുന്നത്. എക്‌സിക്യൂട്ടീവ് പ്രൊഡ്യൂസര്‍ – ശരത്ത് ഗോപിനാഥ്, പ്രൊഡക്ഷൻ കൺട്രോളർ – ഷാജി പട്ടിക്കര. പിആര്‍ഒ നിർവഹണം പിആര്‍ സുമേരനാണ്.
Related Read: റാസ്‌പുടിന് ചുവടുവെച്ച് ജയസൂര്യയുടെ മകള്‍; കോവിഡ് മുൻനിര പ്രവര്‍ത്തകര്‍ക്ക് സമര്‍പ്പിക്കുന്നതായി താരം
