ദുബൈ: കോവിഡ് സുരക്ഷാ നിയമങ്ങൾ പാലിക്കാതെ പാർട്ടി സംഘടിപ്പിച്ച പ്രവാസി യുവതിക്ക് പിഴ ചുമത്തി ദുബൈ പോലീസ്. സ്വന്തം വസതിയിൽ പാർട്ടി നടത്തിയ യുവതിക്ക് 10,000 ദിർഹവും പങ്കെടുത്തവർക്ക് 5,000 ദിർഹവും വീതമാണ് പിഴ ചുമത്തിയിരിക്കുന്നത്. പാർട്ടിയിൽ പങ്കെടുത്തവർ സാമൂഹിക അകലം പാലിക്കുകയോ മാസ്ക് ധരിക്കുകയോ ചെയ്തിട്ടില്ല.
ഇത്തരത്തിൽ നിയമം ലംഘിച്ച് പാർട്ടി നടത്താനോ, ആളുകളെ ക്ഷണിക്കാനോ, യോഗങ്ങൾ കൂടാനോ, പൊതു, സ്വകാര്യസ്ഥലങ്ങളിൽ ഒത്തുകൂടാനോ അനുവദിക്കില്ലെന്നും സംഘടിപ്പിക്കുന്നവർക്ക് പിഴ ചുമത്തുമെന്നും ദുബൈ പോലീസ് സിഐഡി ഡയറക്ടർ വ്യക്തമാക്കി. പാർട്ടിയിൽ പങ്കെടുത്ത സംഗീത ബാൻഡിലെ അംഗങ്ങൾക്കും അതിഥികൾക്കുമാണ് പിഴ ചുമത്തിയത്.
അതേസമയം, കോവിഡ് നിയമലംഘനങ്ങൾ കണ്ടെത്താൻ ഊർജിത പരിശോധനയാണ് ദുബൈയിൽ നടത്തുന്നത്. സുരക്ഷാ നിർദ്ദേശങ്ങൾ പാലിക്കാതിരുന്ന ചില സ്ഥാപനങ്ങൾ അടപ്പിക്കുകയും പിഴ ചുമത്തുകയും ചെയ്തു. വാണിജ്യ-വ്യാപാര സ്ഥാപനങ്ങളിൽ മിന്നൽ പരിശോധനകൾ തുടരുകയാണ്. പൊതുസ്ഥലങ്ങളിൽ മാസ്ക് താഴ്ത്തി വെച്ചു നടക്കുന്നവർക്കെതിരെയും നടപടി ശക്തമാക്കിയിട്ടുണ്ട്.