കുവൈത്ത് സിറ്റി: കോവിഡ് 19 വ്യാപനത്തെ തുടർന്ന് ഏർപ്പെടുത്തിയ നിയന്ത്രണങ്ങൾ തുടരാൻ കുവൈത്ത്. ഇന്ത്യയിൽ നിന്ന് കുവൈത്തിലേക്ക് നേരിട്ടു വരുന്നതിന് ഏർപ്പെടുത്തിയ വിലക്ക് തുടരും. വിലക്ക് ഏർപ്പെടുത്തിയ രാജ്യങ്ങളുടെ പട്ടികയിൽ ഉടൻ മാറ്റം വരുത്തേണ്ടെന്ന് കുവൈത്ത് മന്ത്രിസഭാ യോഗം തീരുമാനിച്ചു.
നിലവിൽ കോവിഡ് വ്യാപനം കൂടിയ 32 രാജ്യങ്ങൾക്കാണ് കുവൈത്ത് വിലക്ക് ഏർപ്പെടുത്തിയത്. ഈ രാജ്യങ്ങളിൽ നിന്ന് നേരിട്ട് കുവൈത്തിലേക്ക് വരുന്നതിനുള്ള വിലക്ക് തുടരും. എന്നാൽ, വിലക്കില്ലാത്ത മറ്റേതെങ്കിലും ഒരു രാജ്യത്ത് 14 ദിവസം ക്വാറന്റൈനിൽ നിന്നതിനു ശേഷം കുവൈത്തിലേക്ക് പോകുന്നതിന് തടസമില്ല.
കോവിഡ് വ്യാപനത്തിന്റെ പശ്ചാത്തലത്തിൽ ഇന്ത്യ ഉൾപ്പെടെ ഏഴു രാജ്യങ്ങളിൽ നിന്നു നേരിട്ട് വരുന്നവർക്കായിരുന്നു ആദ്യം കുവൈത്ത് വിലക്ക് ഏർപ്പെടുത്തിയത്. പിന്നീട് രണ്ടു തവണയായി പട്ടിക വിപുലീകരിക്കുകയായിരുന്നു.