കൊൽക്കത്ത: നിയമസഭാ തിരഞ്ഞെടുപ്പിലെ വിജയത്തിന് പിന്നാലെ തൃണമൂൽ കോൺഗ്രസിൽ വൻ അഴിച്ചുപണി. യുവജന വിഭാഗം നേതാവും മുഖ്യമന്ത്രി മമതാ ബാനർജിയുടെ അനന്തരവനുമായ അഭിഷേക് ബാനർജിയാണ് പാർട്ടിയുടെ പുതിയ ദേശീയ ജനറൽ സെക്രട്ടറി. തിരഞ്ഞെടുപ്പ് വിജയത്തിന് ശേഷം ആദ്യമായി ചേർന്ന വർക്കിങ് കമ്മിറ്റി യോഗത്തിലാണ് തീരുമാനം.
പശ്‌ചിമ ബംഗാളിന് പുറത്തേക്ക് സംഘടന വിപുലീകരിക്കാൻ യോഗത്തിൽ തീരുമാനമായതായി തൃണമൂൽ മന്ത്രി പാർത്ഥ ചാറ്റർജി പറഞ്ഞു. പാർട്ടിയിൽ ‘ഒരാൾക്ക് ഒരു സ്‌ഥാനം’ പോളിസി നടപ്പാക്കാൻ തീരുമാനിച്ചതായും അദ്ദേഹം വാർത്താ സമ്മേളനത്തിൽ പറഞ്ഞു.
തൃണമൂൽ യുവജന വിഭാഗത്തിന്റെ ചുമതലയിൽ നിന്ന് അഭിഷേക് ബാനർജി രാജിവെക്കും. പകരം നടി‌യും തൃണമൂൽ നേതാവുമായ സയാനി ഘോഷ് സ്‌ഥാനമേൽക്കും. പാർട്ടി വനിതാവിഭാഗം പ്രസിഡണ്ടായി കകോലി ഘോഷ് ദാസ്‌തിദാർ എംപിയെയും ട്രേഡ് യൂണിയൻ സംഘടനയായ ഐ‌എൻ‌ടി‌ടിയുസിയുടെ ദേശീയ പ്രസിഡണ്ടായി ഡോല സെൻ എംപിയെയും നിയമിച്ചു. മുതിർന്ന നേതാവ് പൂർണേന്ദു ബോസാണ് കർഷക വിഭാഗം പ്രസിഡണ്ട്.
Read also: കേന്ദ്രമന്ത്രിസഭാ പുനഃസംഘടന; ഇ ശ്രീധരനെ പരിഗണിച്ചേക്കും
