മെൽബൺ: നിലവിൽ ലോകത്തിലെ ഏറ്റവും മികച്ച ഏകദിന ബാറ്റ്സ്മാൻ വിരാട് കോലിയാണെന്ന് ഓസ്ട്രേലിയൻ റൺ മെഷീൻ സ്റ്റീവ് സ്മിത്ത്. ഇംഗ്ലണ്ട് പര്യടനത്തിലെ ഓസീസ് ടീമിനോപ്പമുള്ള സ്മിത്ത് ഇൻസ്റ്റാഗ്രാമിൽ ആരാധകരോട് സംസാരിക്കുന്ന വേളയിലാണ് അഭിപ്രായം പങ്കുവെച്ചത്. ചർച്ചക്കിടയിൽ ഏറ്റവും മികച്ച ഏകദിന ബാറ്റ്സ്മാൻ ആരാണെന്ന ചോദ്യത്തിനുള്ള മറുപടിയായാണ് താരം കോലിയുടെ പേര് പരാമർശിച്ചത്.
വിരാട് കോലിയാണ് നിലവിൽ മത്സര രംഗത്തുള്ള ഏകദിന ക്രിക്കറ്റർമാരിലെ ഏറ്റവും മികച്ച റൺവേട്ടക്കാരൻ. 59.34 ശരാശരിയോടെ 11,867 റൺസാണ് കോലി തന്റെ ഏകദിന കരിയറിൽ നേടിയത്. 43 സെഞ്ച്വറി നേടിയ കോലി സച്ചിന്റെ നേട്ടം മറികടക്കുമെന്നാണ് ക്രിക്കറ്റ്‌ ലോകം കരുതുന്നത്. 7 സെഞ്ച്വറികൾ കൂടി നേടിയാൽ ഏറ്റവും കൂടുതൽ ഏകദിന സെഞ്ച്വറി നേടുന്ന ബാറ്റ്സ്മാൻ എന്ന നേട്ടം കോലിക്ക് സ്വന്തമാവും.
ബാംഗ്ലൂർ റോയൽ ചലഞ്ചേഴ്സിലെ കോലിയുടെ സഹതാരമായ ഡിവില്ലിയേഴ്സിനെ ക്കുറിച്ച് ഭ്രാന്തമായ ബാറ്റിംഗിന് ഉടമയെന്നാണ് സ്മിത്ത് വിശേഷിപ്പിച്ചത്.
യുഎഇയിൽ വെച്ച് നടക്കുന്ന ഇത്തവണത്തെ ഐപിഎല്ലിൽ രാജസ്ഥാൻ റോയൽസിലാണ് സ്മിത്ത് കളിക്കാനിറങ്ങുന്നത്. ഇന്ത്യൻ ഓപ്പണർ കെ.എൽ.രാഹുൽ, മലയാളി താരം സഞ്ജു സാംസൺ എന്നീ താരങ്ങളാവും ഐപിഎല്ലിലെ ശ്രദ്ധാ കേന്ദ്രങ്ങളെന്നും സ്മിത്ത് അഭിപ്രായപ്പെട്ടു.
