ന്യൂഡെൽഹി: മുൻ കേന്ദ്രമന്ത്രിയും തൃണമൂൽ കോൺഗ്രസ് നേതാവുമായ യശ്വന്ത് സിൻഹയെ രാഷ്‌ട്രപതി തിരഞ്ഞെടുപ്പിനുള്ള സംയുക്‌ത പ്രതിപക്ഷ സ്‌ഥാനാർഥിയായി പ്രഖ്യാപിച്ചു. കോൺഗ്രസ് കമ്മ്യൂണിക്കേഷൻ തലവൻ ജയറാം രമേശ് ആണ് ഔദ്യോഗിക പ്രഖ്യാപനം നടത്തിയത്.
“വരാനിരിക്കുന്ന രാഷ്‌ട്രപതി തിരഞ്ഞെടുപ്പിൽ, ഒരു പൊതു സ്‌ഥാനാർഥിയെ നിർത്താനും മോദി സർക്കാരിനെ കൂടുതൽ ദുഷ് പ്രവർത്തികളിൽ നിന്ന് തടയാനും ഞങ്ങൾ തീരുമാനിച്ചു. ഇന്ന് നടന്ന യോഗത്തിൽ യശ്വന്ത് സിൻഹയെ പൊതു സ്‌ഥാനാർഥിയായി തിരഞ്ഞെടുത്തു. യശ്വന്ത് സിൻഹക്ക് വോട്ട് ചെയ്യാൻ എല്ലാ രാഷ്‌ട്രീയ പാർട്ടികളോടും ഞങ്ങൾ അഭ്യർഥിക്കുന്നു,”- ജയറാം രമേശ് പറഞ്ഞു.
യശ്വന്ത് സിൻഹയുടെ പ്രചാരണത്തിന് നേതൃത്വം നൽകാൻ കമ്മിറ്റി രൂപീകരിച്ചു. ഔദ്യോഗിക പ്രഖ്യാപനത്തിന് മുൻപ് തന്നെ യശ്വന്ത് സിൻഹ ഇന്ന് ഒരു ട്വീറ്റിൽ സ്‌ഥാനാർഥിത്വം സംബന്ധിച്ച് വ്യക്‌തമായ സൂചന നൽകിയിരുന്നു. പ്രതിപക്ഷ ഐക്യത്തിനായി പ്രവർത്തിക്കാൻ ‘പാർട്ടിയിൽ നിന്ന് മാറിനിൽക്കണ’മെന്ന് യശ്വന്ത് സിൻഹ ട്വീറ്റിൽ പറഞ്ഞു. സിൻഹ തന്റെ രാജിക്കത്ത് തൃണമൂൽ കോൺഗ്രസ് അധ്യക്ഷ മമതാ ബാനർജിക്ക് അയച്ചതായി എൻഡിടിവി റിപ്പോർട് ചെയ്യുന്നു.
“ടിഎംസിയിൽ മമതാജി എനിക്ക് നൽകിയ ബഹുമാനത്തിനും അന്തസ്സിനും ഞാൻ അവരോട് നന്ദിയുള്ളവനാണ്. വലിയൊരു ദേശീയ ലക്ഷ്യത്തിനായി, പ്രതിപക്ഷ ഐക്യത്തിന് വേണ്ടി പ്രവർത്തിക്കാൻ പാർട്ടിയിൽ നിന്ന് മാറിനിൽക്കേണ്ട സമയം വന്നിരിക്കുന്നു. അവർ ഈ നടപടി അംഗീകരിക്കുമെന്ന് എനിക്ക് ഉറപ്പുണ്ട്, ”- അദ്ദേഹം ട്വീറ്റ് ചെയ്‌തു.
ബിജെപി നേതാവും കേന്ദ്ര മന്ത്രിയും ആയിരുന്ന യശ്വന്ത് സിൻഹ 2018ൽ ആണ് പാർട്ടി വിട്ടത്. പിന്നീട് 2021ൽ തൃണമൂൽ കോൺഗ്രസിൽ ചേർന്ന യശ്വന്ത് സിൻഹ പാർട്ടിയുടെ വൈസ് പ്രസിഡണ്ടായി നിയമിതനായി.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
