മലപ്പുറം: മേലാറ്റൂരിൽ സ്വന്തമായി പാർപ്പിടമോ ഭൂമിയോ ഇല്ലാത്തവർക്കായി ലൈഫ് പദ്ധതിയിലൂടെ 54 വീടുകൾ ഒരുങ്ങുന്നു. ലൈഫ് മിഷൻ മുഖേന അപേക്ഷ ക്ഷണിച്ച് അവരിൽ നിന്നും അർഹരായ 54 കുടുംബങ്ങൾക്കാണ് സർക്കാരിന്റെ കൈത്താങ്ങ്.
രണ്ട് കോടി പന്ത്രണ്ടു ലക്ഷത്തി അമ്പതിനായിരം രൂപയാണ് ചിലവ് പ്രതീക്ഷിക്കുന്നത്. പുല്ലിക്കുത്തിലെ 74 സെന്റ് സ്ഥലത്ത് ഒരുമിച്ചാണ് 20 വീടുകൾ നിർമ്മിക്കുന്നത്. ഇതിന്റെ രജിസ്ട്രേഷൻ പൂർത്തിയായി അടുത്ത ഘട്ടത്തിലേക്ക് കടക്കുകയാണ്.
അടിസ്ഥാന സൗകര്യങ്ങൾ എല്ലാം ലഭ്യമാകുന്ന പ്രദേശം കിഴക്കുപുറം ജി.എൽ. പി സ്കൂളിന് പുറകിലായാണ് കണ്ടെത്തിയത്. കുടിവെള്ളം, വൈദ്യുതി,വഴി എന്നിവ ഉറപ്പുവരുത്തിയാണ് സ്ഥലം ഏറ്റെടുത്തത്. മറ്റു വാർഡുകളിലായി 14 പേർക്കോളം ഭൂമി കണ്ടെത്തി നൽകിയിട്ടുമുണ്ട്.
ഇനി 20 പേർക്കുള്ള സ്ഥലമാണ് കണ്ടെത്താൻ ബാക്കിയുള്ളത്. പുല്ലിക്കുത്തിന് സമീപം തന്നെ പദ്ധതിക്ക് അനുയോജ്യമായ ഭൂമി കണ്ടെത്താനുള്ള ശ്രമത്തിലാണ് അധികൃതർ. ഈ മാസം തന്നെ വീടുകളുടെ നിർമ്മാണം ഒരുമിച്ച് ആരംഭിക്കാനാണ് ലക്ഷ്യമിടുന്നത്.