അബുദാബി: ഷഹീന് ചുഴലിക്കാറ്റ് ഒമാന് തീരത്തേക്ക് നീങ്ങുന്ന സാഹചര്യത്തില് യുഎഇയിലും കാലാവസ്ഥാ മുന്നറിയിപ്പ് പുറപ്പെടുവിച്ചു. ശനിയാഴ്ച മുതല് യുഎഇയുടെ കിഴക്കന് തീരങ്ങളില് ചുഴലിക്കാറ്റിന്റെ ആഘാതങ്ങളുണ്ടാകാന് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. അടുത്ത 24 മണിക്കൂറിനുള്ളില് ഷഹീന് ചുഴലിക്കാറ്റ് ഒമാന് തീരത്തേക്ക് അടുക്കുമെന്നും കാലാവസ്ഥാ നിരീക്ഷണ കേന്ദ്രം പറയുന്നു.
ഞായറാഴ്ച ഉച്ചക്ക് ശേഷം രാജ്യത്തെ ചില പ്രദേശങ്ങളില് കാലാവസ്ഥാ മാറ്റമുണ്ടാകും. അല് ഐന് ഉൾപ്പടെയുള്ള കിഴക്കന് പ്രദേശങ്ങളിലാണ് പ്രധാനമായും മാറ്റം പ്രതീക്ഷിക്കപ്പെടുന്നത്. ഒപ്പം രാജ്യത്തിന്റെ തെക്കന് പ്രദേശങ്ങളില് നിന്ന് ചില മധ്യമേഖലാ പ്രദേശങ്ങളിലേക്കും വ്യാപിച്ചേക്കും. ഈ പ്രദേശങ്ങളില് വിവിധ തീവ്രതയിലുള്ള മഴക്ക് സാധ്യതയുണ്ട്. ഇത് താഴ്ന്ന പ്രദേശങ്ങളില് അപ്രതീക്ഷിതമായി വെള്ളക്കെട്ട് രൂപപ്പെടാൻ കാരണമായേക്കുമെന്ന് കാലാവസ്ഥാ നിരീക്ഷണ കേന്ദ്രത്തിന്റെ അറിയിപ്പില് വ്യക്തമാക്കുന്നു.
ശക്തമായ പൊടിക്കാറ്റ് രൂപപ്പെടാനുള്ള സാധ്യതയുമുണ്ട്. ഒമാന് കടല് പൊതുവെ പ്രക്ഷുബ്ധമായിരിക്കും. കിഴക്കന് മേഖലയിലെ താഴ്ന്ന പ്രദേശങ്ങളില് കടല്വെള്ളം കയറാനുള്ള സാധ്യതയും പ്രവചിച്ചിട്ടുണ്ട്. ദേശീയ കാലാവസ്ഥാ നിരീക്ഷണ കേന്ദ്രം സദാസമയവും സ്ഥിതിഗതികള് നിരീക്ഷിച്ചു കൊണ്ടിരിക്കുകയാണെന്നും ജനങ്ങള് കാലാവസ്ഥാ നിരീക്ഷണ കേന്ദ്രത്തിന്റെയും സർക്കാരിന്റെയും എല്ലാ അറിയിപ്പുകളും ശ്രദ്ധിക്കണമെന്നും അധികൃതര് നിർദ്ദേശിച്ചു. മണിക്കൂറില് 11 കിലോമീറ്റര് വേഗതയിലാണ് ഇപ്പോള് ചുഴലിക്കാറ്റ് സഞ്ചരിച്ചു കൊണ്ടിരിക്കുന്നത്.
Most Read: കോവിഡ് വാക്സിനേഷൻ കുട്ടികളിൽ വേഗത്തിലാക്കണം; എയിംസ് ഡയറക്ടർ
