തിരുവനന്തപുരം: കെഎസ്ആര്ടിസി ജീവനക്കാര്ക്ക് ആശ്വാസമായി ശമ്പള വിതരണത്തിന് 40 കോടി രൂപ അനുവദിച്ച് സര്ക്കാര്. കെഎസ്ആര്ടിസി ജീവനക്കാരുടെ ശമ്പളത്തിനായി 40 കോടി രൂപയും 2021 ജൂണ് മാസത്തെ പെന്ഷന് നല്കിയ വകയില് സഹകരണ ബാങ്കുകളുടെ കൂട്ടായ്മക്ക് 70.78 കോടി രൂപയുമാണ് അനുവദിച്ചതെന്ന് ധനകാര്യ മന്ത്രി കെഎന് ബാലഗോപാല് അറിയിച്ചു.
ഇതിനകം 823.18 കോടി രൂപയാണ് 2021 മാര്ച്ച് മാസം മുതല് 2022 ജനുവരി വരെയുള്ള ശമ്പളത്തിനായി ധനവകുപ്പ് അനുവദിച്ചത്. കോവിഡ് മൂലം ബസുകള് പൂര്ണമായും നിരത്തിലിറക്കാന് കഴിയാതിരുന്ന കാലത്തേക്കുള്ള സഹായം എന്ന നിലയിലാണ് തുക അനുവദിച്ചിരിക്കുന്നത്.
കെഎസ്ആര്ടിസി ജീവനക്കാര്ക്ക് പെന്ഷന് നല്കുന്ന സഹകരണ ബാങ്കുകളുടെ കൂട്ടായ്മക്കും സര്ക്കാരാണ് തിരിച്ചടവ് നടത്തി വരുന്നത്. ഈ സാമ്പത്തിക വര്ഷത്തില് മാത്രം 752.16 രൂപയാണ് തിരിച്ചടവായി നല്കിയിട്ടുള്ളത്.
പൊതുമേഖലാ ബാങ്കുകളുടെ കണ്സോര്ഷ്യത്തില് നിന്നും കെഎസ്ആര്ടിസി എടുത്ത ലോണ് തിരിച്ചടക്കാന് 220 കോടി രൂപയും നല്കി. കൂടാതെ ഡീസല് വാങ്ങാന് 20.9 കോടി രൂപ, ടോള് നല്കാന് 3.06 കോടി രൂപ, എസ്ബിഐ മാര്ക്കറ്റ്സ് ലിമിറ്റഡിനു നല്കിയ 1.65 കോടിരൂപ എന്നിവയും സര്ക്കാര് അനുവദിച്ചിട്ടുണ്ട്.
അതേസമയം ഈ വര്ഷത്തെ ബജറ്റില് ആയിരം കോടി രൂപയാണ് കെഎസ്ആര്ടിസിക്കായി മാറ്റി വെച്ചിരുന്നത്. എന്നാല് 1821.65 കോടി രൂപ കെഎസ്ആര്ടിസിക്ക് ഇതിനോടകം സര്ക്കാര് നല്കി കഴിഞ്ഞതായും ധനമന്ത്രി വ്യക്തമാക്കി.
Most Read: പദ്മനാഭസ്വാമി ക്ഷേത്രം സ്പെഷ്യല് ഓഡിറ്റിങ്; കൂടുതല് സമയം അനുവദിച്ച് സുപ്രീം കോടതി