ഇടുക്കി: ചെറുതോണി അണക്കെട്ടിന്റെ നാലാമത്തെ ഷട്ടറും തുറന്നു. 35 സെമീ വീതമാണ് മൂന്നുഷട്ടറുകളും ഉയര്ത്തിയത്. രാവിലെ 11 മണിക്ക് ആദ്യഘട്ടമായി മൂന്നാമത്തെ ഷട്ടര് തുറന്നിരുന്നു. ഒരുമണിക്കൂറിന് ശേഷം രണ്ടാമത്തെ ഷട്ടറും ഉയര്ത്തി. 12.30നാണ് നാലാമത്തെ ഷട്ടര് ഉയര്ത്തിയത്.
ഓരോ തവണയും മൂന്ന് സൈറണുകള് വീതം മുഴങ്ങിയതിന് ശേഷമാണ് ഷട്ടറുകള് തുറന്നത്. മൂന്നാം ഷട്ടര് തുറന്നതിന് പിന്നാലെ വെള്ളത്തിന്റെ സുഗമമായ ഒഴുക്ക് ഉറപ്പുവരുത്തിയ ശേഷമായിരുന്നു രണ്ടാം ഷട്ടര് ഉയര്ത്തിയത്. സെക്കന്റില് ഒരുലക്ഷം ലിറ്റര് വെള്ളമാണ് ഇപ്പോള് പുറത്തേക്ക് ഒഴുകുന്നത്.
മൂന്ന് വര്ഷങ്ങള്ക്ക് ശേഷമാണ് ഇടുക്കി അണക്കെട്ട് തുറന്നത്. 1981 ഒക്ടോബര് 23, 1992 ഒക്ടോബര് 11, 2018 ഓഗസ്റ്റ് 9 എന്നീ വര്ഷങ്ങളിലായിരുന്നു ഇതിനുമുന്പ് ഡാം തുറക്കേണ്ടിവന്നത്. 81ലും 92ലും കാലവര്ഷം രൂക്ഷമായതോടെയും 2018ല് മഹാപ്രളയത്തിന്റെ ഫലമായുമാണ് അണക്കെട്ട് തുറന്നത്.
അതേസമയം 2018ലെ ഡാം തുറക്കലില് ഏറെ വിമര്ശനങ്ങളുണ്ടായ സാഹചര്യത്തിൽ ഇത്തവണ വലിയ മുന്നൊരുക്കങ്ങള്ക്കും കരുതല് നടപടികള്ക്കും ശേഷമാണ് അണക്കെട്ട് തുറക്കാനുള്ള തീരുമാനമുണ്ടായത്. 2018ല് അണക്കെട്ട് തുറന്നപ്പോള് അഞ്ച് ഷട്ടറുകളും ഉയര്ത്തിയാണ് വെള്ളം പുറത്തേക്കൊഴുക്കിയത്.
നിലവിൽ ഷട്ടറുകൾ തുറന്ന സാഹചര്യത്തിൽ പൊതുജനങ്ങളും അധികാരികളും ജാഗ്രത പാലിക്കണമെന്ന് ഇടുക്കി ജില്ലാ കളക്ടർ അറിയിച്ചു. പെരിയാറിലെ ജലനിരപ്പ് ഒരു മീറ്റര് ഉയരും. പുറത്തേക്കൊഴുകുന്ന ജലം വൈകിട്ട് നാലുമണിയോടെ ആലുവ, കാലടി മേഖലയിലെത്തും. 2018ലെ അപേക്ഷിച്ച് പത്തിലൊരു ഭാഗം മാത്രം വെള്ളമാണ് ഇത്തവണയൊഴുക്കുന്നത്.
ഇടുക്കി, വാത്തിക്കുടി, തങ്കമണി, കഞ്ഞിക്കുഴി മേഖലകളില് ജാഗ്രതാ നിര്ദേശം നല്കിയിട്ടുണ്ട്. പെരിയാറിന്റെ തീരത്തുള്ളവര് ജാഗ്രത പാലിക്കണമെന്നും ഡാം മേഖലയിലേക്ക് രാത്രികാല യാത്ര വേണ്ടെന്നും മുന്നറിയിപ്പ് നല്കിയിട്ടുണ്ട്.
Most Read: ഉത്തരാഖണ്ഡില് വീണ്ടും മേഘവിസ്ഫോടനം