ഗുവാഹട്ടി: അരുണാചല്‍ പ്രദേശില്‍ കാണാതായ അഞ്ച് പേരെ ചൈന അറസ്റ്റ് ചെയ്തതായി റിപ്പോര്‍ട്ട്. ചില ചൈനീസ് മാദ്ധ്യമങ്ങളാണ് കാണാതായവരെ അറസ്റ്റ് ചെയ്തതായി റിപ്പോര്‍ട്ട് ചെയ്തിരിക്കുന്നത്. മറ്റൊരു പ്രതികരണവും ചൈനയുടെ ഭാഗത്ത് നിന്ന് ഇതുവരെയും ഉണ്ടായിട്ടില്ല.
അപ്പര്‍ സുബാന്‍സിരി ജില്ലയില്‍ കാട്ടിനുള്ളിലെ പ്രദേശമായ സേരാ സെവനില്‍ വെച്ചാണ് സംഭവം. അതിര്‍ത്തി മേഖലയായ ഇവിടെ നിന്നുമാണ് സൈന്യം ആളുകളെ പിടികൂടിയത്. അരുണാചലിലെ കാടുകളില്‍ വേട്ടക്ക് പോയവരായിരുന്നു ഇവര്‍. അടുത്തുള്ള ഗ്രാമമായ നാച്ചോയില്‍ നിന്ന് രണ്ട് ദിവസം നടന്നാല്‍ മാത്രമേ സേരാ സെവന്‍ മേഖലയിലേക്ക് എത്തിച്ചേരാന്‍ സാധിക്കുകയുള്ളൂ.
സ്ഥലത്തെ കോണ്‍ഗ്രസ് എംഎല്‍എയായ നിനോംഗ് എറിംഗ് ആണ് ആളുകളെ തട്ടിക്കൊണ്ടുപോയ വിവരം ആദ്യമായി പുറംലോകത്തെ അറിയിച്ചത്. ട്വിറ്ററിലൂടെയായിരുന്നു അദ്ദേഹം വിവരം കൈമാറിയത്. സമാനമായ സംഭവങ്ങള്‍ മേഖലയില്‍ പലപ്പോഴായി നടക്കുന്നുണ്ടെന്നും അദ്ദേഹം ചൂണ്ടിക്കാട്ടിയിരുന്നു. കൂടാതെ ഇതിന് തക്കതായ മറുപടി നല്‍കണമെന്നും അദ്ദേഹം ആവശ്യപ്പെടുകയുണ്ടായി.
നീക്കത്തിന് പിന്നില്‍ ചൈനയുടെ പീപ്പിള്‍സ് ലിബറേഷന്‍ ആര്‍മിയാണെന്ന് എംഎല്‍എ നിനോംഗ് എറിംഗ് ട്വീറ്റില്‍ പറഞ്ഞു. കൂടാതെ ചൈന തട്ടിക്കൊണ്ടുപോയവരുടെ വിവരങ്ങള്‍ പുറത്തുവിട്ട ഇദ്ദേഹം അവരിലൊരാളുടെ സഹോദരന്റെ ഫേസ്ബുക്ക് പോസ്റ്റും പങ്കുവെച്ചു.
എംഎല്‍എ നിനോംഗ് എറിംഗിന്റെ ട്വീറ്റ്‌:
SHOCKING NEWS: Five people from Upper Subansiri district of our state Arunachal Pradesh have reportedly been ‘abducted’ by China’s People’s Liberation Army (PLA).
Few months earlier,a similar incident happened. A befitting reply must be given to #PLA and #CCPChina. @PMOIndia https://t.co/8gRdGsQfId pic.twitter.com/KbDMJ3bUi2
— Ninong Ering (@ninong_erring) September 4, 2020
