ന്യൂഡെല്ഹി : വിവാദ കാര്ഷിക നിയമങ്ങളെ പറ്റി പഠിക്കാനായി സുപ്രീംകോടതി നിയോഗിച്ച വിദഗ്ധ സമിതി കര്ഷക സംഘടനകളുമായി ചര്ച്ച നടത്തും. ജനുവരി 21ആം തീയതിയാണ് ചര്ച്ച നടത്തുക. ചര്ച്ചയില് സര്ക്കാരിനും ആവശ്യമെങ്കില് പങ്കെടുക്കാമെന്ന് സമിതി അറിയിച്ചു. ചര്ച്ച നടക്കുന്നിടത്തേക്ക് നേരിട്ടെത്താന് ബുദ്ധിമുട്ടുള്ള കര്ഷക സംഘടനാ നേതാക്കള്ക്ക് വീഡിയോ കോണ്ഫറന്സിലൂടെ വേണമെങ്കിലും ചര്ച്ചയില് പങ്കെടുക്കാം.
കാര്ഷിക നിയമങ്ങളെ പറ്റി പഠനം നടത്താനായി സുപ്രീംകോടതി നിയോഗിച്ച നാലംഗ സമിതിയില് നിന്നും ഭാരതീയ കിസാന് യൂണിയന് നേതാവ് ഭൂപേന്ദ്ര സിംഗ് മാന് നേരത്തെ രാജി വച്ചിരുന്നു. അതിനാല് ബാക്കിയുള്ള 3 അംഗങ്ങളായിരിക്കും കര്ഷക സംഘടനാ നേതാക്കളുമായി ചര്ച്ച നടത്തുക.
അതേസമയം തന്നെ റിപ്പബ്ളിക് ദിനത്തില് കര്ഷക സംഘടനകള് നടത്താന് തീരുമാനിച്ച ട്രാക്ടര് റാലിയില് കാര്ഷിക സംസ്കാരത്തിന്റെ കഥകള് പറയുന്ന ദൃശ്യങ്ങള് ഉള്പ്പെടുത്തുമെന്ന് കര്ഷക നേതാക്കള് വ്യക്തമാക്കി. എന്നാല് ട്രാക്ടര് റാലി ഒഴിവാക്കണമെന്നും, ക്രമസമാധാന ലംഘനം ഉണ്ടാക്കരുതെന്നും ആവശ്യപ്പെട്ട് പോലീസ് കര്ഷക സംഘടനാ നേതാക്കളുമായി ചര്ച്ച നടത്തിയിരുന്നു. എന്നാല് റാലി നടത്തുന്നതില് പിന്മാറാന് ഒരുക്കമല്ലെന്ന നിലപാടില് തന്നെയാണ് കര്ഷക സംഘടനാ നേതാക്കള്.
Read also : കെപിസിസി താല്ക്കാലിക അധ്യക്ഷനായി കെ സുധാകരന് എത്തിയേക്കും