തിരുവനന്തപുരം: മുഖ്യമന്ത്രി പിണറായി വിജയന് എതിരായ വിവാദ പരാമർശത്തിൽ കൊടിക്കുന്നിൽ സുരേഷ് എംപിക്ക് മറുപടിയുമായി മന്ത്രി കെ രാധാകൃഷ്‌ണൻ. തന്നെ നിയന്ത്രിക്കാൻ പാർടി ആരെയും ചുമതലപ്പെടുത്തിയിട്ടില്ലെന്ന് മന്ത്രി പറഞ്ഞു. സ്വന്തം സ്‌ഥാനത്തിനും വലുപ്പത്തിനും ചേർന്നതാണോ പ്രസ്‌താവനയെന്നു കൊടിക്കുന്നിൽ സുരേഷ് എംപി പരിശോധിക്കണമെന്നും കെ രാധാകൃഷ്‌ണൻ പ്രതികരിച്ചു.
രണ്ടാം പിണറായി സര്‍ക്കാരില്‍ കെ രാധാകൃഷ്‌ണനെ ദേവസ്വം മന്ത്രിയാക്കി നിയമിച്ചത് വലിയ നവോത്ഥാനമാക്കി ഉയര്‍ത്തിക്കാട്ടി എന്നായിരുന്നു കൊടിക്കുന്നിൽ സുരേഷ് എംപിയുടെ പ്രസ്‌താവന. പട്ടിക ജാതിക്കാരനായ മന്ത്രിക്ക് ദേവസ്വം വകുപ്പ് കൊടുത്തതിനെ കൊട്ടിഘോഷിക്കുകയും അതേസമയം, മന്ത്രിയെ നിയന്ത്രിക്കുന്നതിനായി തന്റെ മനഃസാക്ഷി സൂക്ഷിപ്പുകാരനെ നിയമിക്കുകയും ചെയ്‌തു. പിണറായി വിജയൻ നവോത്ഥാന നായകനായിരുന്നുവെങ്കിൽ മകളെ പട്ടിക ജാതിക്കാരന് കല്യാണം കഴിച്ചു കൊടുക്കണമായിരുന്നു എന്നുമായിരുന്നു കൊടിക്കുന്നിൽ സുരേഷ് പറഞ്ഞത്.
പ്രസ്‌താവന വിവാദമായ ശേഷവും താൻ നിലപാടിൽ ഉറച്ചു നിൽക്കുന്നു എന്നാണ് അദ്ദേഹം പറഞ്ഞത്. പൊതുസമൂഹം ചർച്ച ചെയ്‌ത പ്രശ്‌നമാണ് താൻ സാന്ദർഭികമായി സൂചിപ്പിച്ചതെന്ന് കൊടിക്കുന്നിൽ സുരേഷ് പറഞ്ഞു.
Most Read: കോവിഡ് പ്രതിരോധം; കേരളത്തിന് നിർദ്ദേശങ്ങൾ നൽകി കേന്ദ്രം
