തിരുവനന്തപുരം: മുഖ്യമന്ത്രിക്കെതിരായ കൊടിക്കുന്നിൽ സുരേഷ് എംപിയുടെ പ്രസ്താവനക്കെതിരെ സിപിഐഎം. നേതാക്കളുടെ ഇത്തരം പ്രസ്താവനകൾ കോൺഗ്രസിന്റെ അധപതനത്തിന്റെ തെളിവാണ്. കോൺഗ്രസ് നേതാക്കളുടെ തുടരുന്ന വ്യക്തിഹത്യ അവസാനിപ്പിക്കണമെന്ന് സിപിഐഎം സംസ്ഥാന സെക്രട്ടറിയേറ്റ് പ്രസ്താവനയില് ആവശ്യപ്പെട്ടു.
മുഖ്യമന്ത്രി പിണറായി വിജയനെയടക്കം സിപിഐഎം നേതാക്കളെയും കുടുംബാംഗങ്ങളെയും യാതൊരു അടിസ്ഥാനവുമില്ലാത്ത കാര്യങ്ങളുന്നയിച്ച് നിരന്തരമായി ആക്ഷേപിക്കുകയാണ് കോണ്ഗ്രസ് നേതാക്കള്. എല്ലാ പരിധിയും ലംഘിച്ചുകൊണ്ട് നേതാക്കള് നടത്തുന്ന പ്രസ്താവനകള് കോണ്ഗ്രസിന്റെ അധപതനത്തിന്റെ തെളിവാണ്. അതിന്റെ ഏറ്റവും ഒടുവിലത്തെ ഉദാഹരണമാണ് കൊടിക്കുന്നില് സുരേഷ് മുഖ്യമന്ത്രിയുടെ കുടുംബത്തിനു നേരെ നടത്തിയ പ്രതികരണം.
കൊടിക്കുന്നില് നടത്തിയ അധിക്ഷേപത്തെ സോണിയാ ഗാന്ധിയും കെപിസിസി നേതൃത്വവും പിന്തുണക്കുന്നുണ്ടോയെന്ന് വ്യക്തമാക്കണമെന്നും സിപിഐഎം പ്രസ്താവനയില് ആവശ്യപ്പെട്ടു. സിപിഐഎം നേതാക്കള്ക്കെതിരായ കോണ്ഗ്രസിന്റെ വ്യക്ത്യാധിക്ഷേപങ്ങളില് ജനാധിപത്യത്തില് വിശ്വസിക്കുന്ന എല്ലാവരും പ്രതിഷേധം ഉയര്ത്തണമെന്നും സിപിഐഎം സംസ്ഥാന സെക്രട്ടറിയേറ്റ് പ്രസ്താവനയില് പറഞ്ഞു.