ന്യൂ ഡെല്ഹി; റാബി വിളകളുടെ താങ്ങുവില ഉയര്ത്തി കര്ഷക പ്രതിഷേധം തണുപ്പിക്കാന് കേന്ദ്ര സര്ക്കാര് നീക്കം. കാര്ഷിക ബില്ലില് താങ്ങു വിലയെ പറ്റി പരാമര്ശിക്കാത്തത് ജനദ്രോഹപരമാണെന്നും സര്ക്കാര് ഇത് എടുത്തു മാറ്റാനുള്ള തയ്യാറെടുപ്പില് ആണെന്നും പ്രതിപക്ഷം ആരോപിച്ചിരുന്നു. ഇതിന് പിന്നാലെയാണ് റാബി വിലകളായ ഗോതമ്പ്, പരിപ്പ്, പയറു വര്ഗ്ഗങ്ങള് എന്നിവയുടെ താങ്ങുവിലയാണ് വര്ദ്ധിപ്പിക്കാന് കേന്ദ്ര സര്ക്കാര് തീരുമാനം എടുത്തത്.
ഗോതമ്പിന്റെ താങ്ങുവില 50 രൂപ വര്ദ്ധിപ്പിച്ച് 1975 രൂപയാക്കി. കടുക്, പയറു വര്ഗ്ഗങ്ങള് എന്നിവ 225 രൂപയാണ് വര്ദ്ധിപ്പിച്ചത്. ഏറ്റവും കൂടുതല് വില കൂട്ടിയത് പരിപ്പിനാണ്, 300 രൂപ. ഇതിന് പ്രധാനമന്ത്രി അംഗീകാരം നല്കിയതായി കേന്ദ്ര എക്കണോമിക് അഫയേഴ്സ് ക്യാബിനറ്റ് കമ്മിറ്റിയാണ് വാര്ത്താകുറിപ്പിലൂടെ അറിയിച്ചത്. വില വര്ദ്ധനവിന് സ്വാമിനാഥന് കമ്മീഷന്റെ ശുപാര്ശ ഉണ്ടായിരുന്നു എന്നും കുറിപ്പില് സൂചിപ്പിക്കുന്നു.
തീരുമാനത്തിലൂടെ രാജ്യവ്യാപകമായി നടക്കുന്ന കര്ഷക പ്രക്ഷോഭങ്ങള്ക്ക് ഒരു പരിധി വരെ തടയിടാനാണ് കേന്ദ്രത്തിന്റെ ശ്രമം. എന്നാല് പഞ്ചാബ് മുഖ്യമന്ത്രി അമരീന്ദര് സിംഗ് ഇതിനെതിരെ രംഗത്തു വന്നു. കര്ഷകരെ കളിയാക്കുന്നതാണ് കേന്ദ്ര തീരുമാനമെന്ന് അമരീന്ദര് സിംഗ് ആരോപിച്ചു.