തിരുവനന്തപുരം : കരിപ്പൂർ സ്വർണക്കടത്ത് കേസിൽ ടിപി വധക്കേസ് പ്രതി മുഹമ്മദ് ഷാഫിയെ കസ്റ്റംസ് ഇന്ന് ചോദ്യം ചെയ്യും. സ്വർണക്കടത്തിൽ അറസ്റ്റിലായ മുഹമ്മദ് ഷഫീഖ്, അർജുൻ ആയങ്കി എന്നിവരുടെ മൊഴികളുടെയും ലഭ്യമായ തെളിവുകളുടെയും അടിസ്ഥാനത്തിലാണ് ഷാഫിയെ ചോദ്യം ചെയ്യുന്നത്. ചോദ്യം ചെയ്യലിനായി ഇന്ന് രാവിലെ 11 മണിക്ക് കൊച്ചിയിലെ പ്രിവന്റീവ് കമ്മിഷണറേറ്റിൽ ഹാജരാകാനാണ് ഷാഫിക്ക് അന്വേഷണ സംഘം നിർദ്ദേശം നൽകിയിരിക്കുന്നത്.
ടിപി വധക്കേസിൽ ജീവപര്യന്തം ശിക്ഷ ലഭിച്ച ഷാഫി നിലവിൽ പരോളിൽ കഴിയുകയാണ്. സ്വർണം കടത്തുന്നതിനും, കടത്തിയ സ്വർണം കവർച്ച ചെയ്യുന്നതിനും ഷാഫിയുടെ നേതൃത്വത്തിലുള്ള സംഘം പിന്തുണ നൽകിയെന്നാണ് പ്രതികൾ അന്വേഷണ സംഘത്തോട് വെളിപ്പെടുത്തിയത്.
കൂടാതെ ഷാഫിയുടെ വീട്ടിൽ നിന്നും കണ്ടെടുത്ത ഡിജിറ്റൽ ഉപകരണങ്ങളിൽ നിന്നുള്ള തെളിവുകളും ഷാഫിക്ക് എതിരാണ്. അതേസമയം ഷാഫിയെ ചോദ്യം ചെയ്യുന്നതിന് മുന്നോടിയായി ഇന്നലെ പാനൂർ സ്വദേശിയായ സക്കീനയെ അന്വേഷണ സംഘം ചോദ്യം ചെയ്തിരുന്നു. സക്കീനയുടെ പേരിലെടുത്ത 4 സിം കാർഡുകൾ അർജുൻ ആയങ്കിയും സംഘവും സ്വർണക്കടത്ത് ക്വട്ടേഷൻ പ്രവർത്തനങ്ങൾക്ക് ഉപയോഗിച്ചതായി അന്വേഷണ സംഘം കണ്ടെത്തിയിട്ടുണ്ട്.
Read also : എസ്എസ്എൽസി ഫലം നാളെ പ്രഖ്യാപിക്കും; ഇന്ന് പരീക്ഷാബോർഡ് യോഗം