ന്യൂഡെൽഹി : രാജ്യത്ത് തുടർച്ചയായി 4ആം ദിവസവും പ്രതിദിന കോവിഡ് ബാധിതരുടെ എണ്ണം ഒരു ലക്ഷത്തിൽ താഴെ. കഴിഞ്ഞ 24 മണിക്കൂറിൽ രാജ്യത്ത് കോവിഡ് ബാധിതരായ ആളുകളുടെ എണ്ണം 91,702 ആണ്. ഇതോടെ രാജ്യത്തെ ആകെ കോവിഡ് ബാധിതരുടെ എണ്ണം 2,92,74,823 ആയി ഉയർന്നു. അതേസമയം രോഗബാധിതരുടെ എണ്ണം കുറയുമ്പോഴും പ്രതിദിന കോവിഡ് മരണം ഉയർന്നു തന്നെ തുടരുകയാണ്. കഴിഞ്ഞ 24 മണിക്കൂറിൽ 3,403 ആളുകൾക്കാണ് രാജ്യത്ത് കോവിഡിനെ തുടർന്ന് ജീവൻ നഷ്ടമായത്.
1,34,580 ആളുകൾക്കാണ് കഴിഞ്ഞ 24 മണിക്കൂറിൽ രാജ്യത്ത് രോഗമുക്തി ഉണ്ടായത്. ഇതോടെ ഇതുവരെ രോഗബാധിതരായ ആളുകളിൽ 2,77,90,073 ആളുകളും രോഗമുക്തി നേടിയിട്ടുണ്ട്. കൂടാതെ കോവിഡിനെ തുടർന്ന് ഇതുവരെ മരിച്ച ആകെ ആളുകളുടെ എണ്ണം 3,63,029 ആയും ഉയർന്നു. രോഗബാധിതരുടെ എണ്ണത്തിൽ ഉണ്ടാകുന്ന കുറവും, രോഗമുക്തരുടെ എണ്ണത്തിൽ ഉണ്ടാകുന്ന ഉയർച്ചയും മൂലം നിലവിൽ രാജ്യത്ത് കോവിഡിനെ തുടർന്ന് ചികിൽസയിൽ കഴിയുന്നവരുടെ എണ്ണത്തിൽ കുറവ് രേഖപ്പെടുത്തുന്നുണ്ട്.
11,21,671 ആളുകളാണ് നിലവിൽ രാജ്യത്തിന്റെ വിവിധ ഭാഗങ്ങളിലായി ചികിൽസയിൽ കഴിയുന്നത്. അതേസമയം 5 വയസിൽ താഴെയുള്ള കുട്ടികൾ മാസ്ക് ധരിക്കേണ്ടെന്ന് ആരോഗ്യ മന്ത്രാലയത്തിന് കീഴിലുള്ള ഡയറക്ടർ ജനറൽ ഓഫ് ഹെൽത്ത് സർവീസസ് നിർദ്ദേശം നൽകി. 6 മുതൽ 11 വയസ് വരെയുള്ള കുട്ടികൾക്ക് രക്ഷിതാക്കളുടെയോ, ഡോക്ടർമാരുടെയോ മേൽനോട്ടത്തിൽ മാസ്ക് ധരിക്കാമെന്നും, 12 വയസ് മുതലുള്ള കുട്ടികൾ മുതിർന്നവരെ പോലെ മാസ്ക് കൃത്യമായി ധരിക്കണമെന്നും നിർദ്ദേശത്തിൽ വ്യക്തമാക്കുന്നുണ്ട്.
Read also : ഫ്രഞ്ച് ഓപ്പൺ വനിതാ ഫൈനൽ; പവ്ള്യുചെങ്കോവയും ക്രസികോവയും ഏറ്റുമുട്ടും