ന്യൂഡല്ഹി: ഡല്ഹി കലാപവുമായി ബന്ധപ്പെട്ട് ഡോക്യുമെന്ററി സംവിധായകരായ രാഹുല് റോയിയെയും സബാ ദീവാനെയും ഡല്ഹി പോലീസ് ചോദ്യം ചെയ്യാന് വിളിപ്പിച്ചു. ഗൂഢാലോചനക്കുറ്റം ചുമത്തി മുന് ജവഹര്ലാല് നെഹ്റു യൂണിവേഴ്സിറ്റി (ജെഎന്യു) വിദ്യാര്ത്ഥി ഉമര് ഖാലിദിനെ അറസ്റ്റ് ചെയ്തതിന് തൊട്ടുപിന്നാലെയാണ് ഫെബ്രുവരിയിലെ കലാപവുമായി ബന്ധപ്പെട്ട് ഇരുവരേയും പോലീസ് വിളിപ്പിച്ചത്.
കലാപവുമായി ബന്ധപ്പെട്ട് പോലീസ് സമര്പ്പിച്ച അനുബന്ധ കുറ്റപത്രത്തില് രാഹുല് റോയിയുടെ പേര് ഉള്പ്പെടുത്തിയിരുന്നു. എന്നാല് സബാ ദീവാനെ ഉള്പ്പെടുത്തിയിരുന്നില്ല. ഇരുവരും ‘ഡല്ഹി പ്രൊട്ടസ്ററ് സപ്പോര്ട്ട് ഗ്രൂപ്പ്’ എന്ന വാട്സ്ആപ് ഗ്രൂപ്പിന്റെ ഭാഗമായിരുന്നു എന്ന ആരോപണത്തെ തുടര്ന്നാണ് പോലീസ് നടപടി.
Read also: ഡെല്ഹി കലാപം; ഉമര് ഖാലിദ് അറസ്റ്റില്
പൗരത്വ (ഭേദഗതി) നിയമത്തിനെതിരായ പ്രതിഷേധത്തില് പങ്കെടുത്തവരെ അറസ്റ്റ് ചെയ്ത് സമരം അടിച്ചമര്ത്താനാണ് ഡല്ഹി പോലീസ് ശ്രമിക്കുന്നതെന്ന് വെല്ഫെയര് പാര്ട്ടി ഓഫ് ഇന്ത്യ ആരോപിച്ചു. ഡല്ഹി പൊലീസ് തയാറാക്കിയ അനുബന്ധ കുറ്റപത്രത്തില് സി.പി.എം ജനറല് സെക്രട്ടറി സീതാറാം യെച്ചൂരി, സ്വരാജ് അഭിയാന് നേതാവ് യോഗേന്ദ്ര യാദവ്, സാമ്പത്തിക ശാസ്ത്രജ്ഞന് ജയതിഘോഷ് തുടങ്ങിയവരും ഉള്പ്പെടുന്നു.